「基層醫療十年計劃」議案

主席，香港醫院嘅醫療水平，喺國際上係非常之高，但因為醫護人手同床位不足，導致醫療服務輪候時間較長，尤其係喺公立醫院。隨着香港人口持續老化，有關問題愈見嚴重。但只要我哋嘅基層醫療服務可以做好啲，可以有效咁防止小病變大病，教識大家如何保持健康，少啲病痛，就可以大大減少對住院服務嘅需求，令到真正患上重症，需要入院同做手術嘅病人，可以及早得到診斷同治療。

呢個正係我哋國家醫療衞生政策嘅發展方向。早喺新冠疫情爆發前幾年，國家主席習近平已提出「健康中國」嘅理念，強調「人民健康是民族昌盛和國家富強的重要指標」；「沒有全民健康，就沒有全面小康」；「要完善國民健康政策，為人民提供全方位、全周期健康服務」。

乜嘢叫做全方位、全周期嘅健康服務呢？重點之一，就係堅持「預防是最經濟、最有效的健康策略」，「將預防關口前移，避免小病釀成大疫」；仲有係要善用科技同推動醫療創新；發揮中醫藥喺預防治療、康復治療同中西合璧治療嘅重要作用；透過推廣體育同健康生活，嚟預防控制疾病等；與陳凱欣議員今日提出嘅「基層醫療十年計劃」議案，以及多位議員提出嘅修正案，內容不謀而合。

作為建築、測量、都市規劃及園境界嘅代表，我想集中講下健康、綠色城市同建築，對醫療需求嘅重要性。香港有多達67%嘅土地，規劃咗為郊野公園同綠化帶，但可供房屋發展嘅土地嚴重不足，政府長期忽略市民嘅居住環境質素，數以十萬計嘅市民居於面積狹小、環境惡劣嘅劏房。政府嘅嘅規劃同房屋政策，唔少人感覺只係重量而不重質，只係設法去起多啲單位，令市民難以住得舒適同健康。喺今次新冠病毒疫情，大家就充分體會到居住空間過小、過密，對公共衞生同個人健康帶嚟嘅嚴重影響。

我喺2012年、即係差不多10年之前，首次擔任議員期間，已提出政府要訂立「人均居住面積」指標，致力讓港人「住大啲、住鬆啲、住好啲」。我同時提倡喺居所附近，要一定嘅綠化同公共空間，便利市民步行嘅道路交通系統，以及鼓勵長幼共融同居家安老嘅樓宇設計同設施等等，促使市民住得健康，少啲病痛，少啲出入醫院同睇醫生。

政府最初並冇積極跟進，甚至質疑有關想法係「何不食肉糜」，結果導致納米樓湧現，塞車同熱島效應惡化，對市民健康造成影響。去到現屆政府嘅任期尾段，當局終於認同要制訂居住面積指標同最細單位嘅限制。政府亦接納我同業界嘅建議，喺「明日大嶼願景」嘅規劃當中，引入低碳、易行、職住平衡、以及發展與保育並重等概念。

目標、理念同政策都有喇，現在尚欠落實執行，尤其係快速、有效咁去執行，關鍵係要精簡發展審批，提升政府績效，達致更快捷咁，將香港建設成一個健康、綠色嘅宜居城市。主席，本人僅此陳詞。