「更積極地管理好政府的非金融資產」議案發言

主席，我一向都好關注政府嘅財政情況同公帑運作。原議案促請政府更積極地管理好旗下嘅非金融資產，「盤活」其營運模式與融資方法，以提升相關資產嘅效益，為穩定本港財政作出貢獻，有關原則我當然支持，亦未必要諗到將資產出售或者再融資咁複雜；單單管好政府嘅轄下嘅各個基金同公司，善用好政府擁有嘅土地同物業，已經可為庫房帶來更大收入，或者最少可幫納稅人慳番唔少冤枉錢。

市民同議員不時批評政府大花筒同濫用公帑，針對嘅大多係政府部門同公務員，但其實有相當嘅政府經常開支，係用喺不同嘅公營、法定及資助機構。但有關機構有冇嚴格咁管控開支同有效咁運用資源，公眾、立法會、以至相關政策局對佢哋嘅關注卻明顯不足，相關監察機制相信有唔少優化空間。

截止去年3月，政府一共管有9個法定基金，以及28個因不同目的而成立嘅專項基金。當中好多都同教育有關，包括優質教育基金、資優教育基金、自資專上教育基金等等。早前財委會討論向「香港特別行政區政府獎學基金」注資，就有多位議員質疑當局管理有關基金嘅手法同安排。

政府另外仲擁有13間持股量多於5成嘅企業，包括港鐵、機管局、數碼港、科技園等等。當中部分係管理得唔錯嘅，唔單止做到自付盈虧，仲可以為政府帶來一定收入。但亦有唔少係年年蝕錢，不時要納稅人注資救亡，或者借咗政府錢就一去冇回頭，例如海洋公園同迪士尼公司。

最新一個叫做「會計及財務匯報局」，2019年成立時攞咗政府4億，但今個財政年度估計有1.7億赤字，而睇唔到負責嘅財經事務及庫務局，有對「會財局」嘅財政提出有效嘅監察同持續嘅營運計劃，因此對於向「會財局」注資2億元、以應對該局本年度營運開支嘅撥款建議，我係投咗反對票。

此外，我同好多社會人士都批評過，早幾年政府一直嗌冇地起樓，一方面又任由好多政府土地同建築物長期丟空，做咗「土地大嘥鬼」。經過各方努力，近年已有多間空置校舍改建成過渡性房屋，多幅閒置官地攞咗嚟起簡約公屋，造福市民。

主席，無論係唔係面對財赤，政府都有必要改變心態同檢視相關制度，更積極同主動咁，管好政府嘅各類資產。我哋嘅議員同事們，喺監察公帑運用時，除咗關注政府部門嘅公務員開位建議，以及新工程嘅設計同造價，對於一啲公營、法定及資助機構嘅資源運用，對於一啲現有政府設施同土地嘅有效善用，亦應該多加關注，促使有關機構善用公帑、減少浪費、提高效率、同提升效益，更好咁服務社會。本人謹此陳詞，支持原議案及修正案。