「積極建設香港成為國際教育樞紐」議案

主席，雖然有部分人士對香港嘅中小學教育同個別大學院校嘅管治有意見，但整體而言，本港大學嘅教學、科研、師資同設施水平都係相當高。香港幾間較知名嘅大學，亦一直有收取唔少外國學生，但相對於英、美、澳洲、同加拿大等地嘅大學，包括一啲國際排名相對較低嘅院校，本港嘅大學喺國際化同產業化方面似乎仍未夠積極，喺對外宣傳同爭取外國學生方面可以更加進取。

對於有關情況，部分人認為，可能係特區政府提供畀大學嘅資助已經好充裕，加上有充足嘅本地同內地優質學生就讀，令大學唔需要好主動咁對外搶人才。但隨着香港適齡學生減少，喺海內外嘅升學選擇增多，本地大學有必要改變過去「皇帝女唔憂嫁」嘅心態。

原議案提出要「積極建設香港成為國際教育樞紐」，當然唔只係為咗啲大學，更重要協助香港同國家，吸引同培育更多來自世界各地嘅人才，並期望當中部分人修讀畢業後，能夠為香港同國家發展作出貢獻。就算佢哋最後唔留低工作，通過親身喺香港學習同生活，了解到特區嘅真實情況，認識到我國嘅發展、文化同價值觀，與本地同內地學生建立友誼，就係最好嘅方法去說好香港故事、說好中國故事。

好多歐美嘅大學，甚至中學，喺當地政府支持下，多年來積極向全球招生，除咗係希望吸引人才同增加外匯收入，亦係想通過潛移默化，令海外嘅青年人了解同認同佢哋嘅文化與價值觀，可以稱之為一種教育外交。香港嘅教育機構需要喺呢方面加把勁，政府亦要喺政策上，制度上，包括入境同工作安排等加以配合，面向全球，招生引才。

主席，今次議案一共有5位議員提出修訂，當中3位都不約而同提到，香港需要加強職專教育，包括推動成立「應用科學大學」，讓修讀職專課程嘅學生亦有望取得大學學位；爭取不同地區認可香港嘅職專教育資歷；以及加強新一代對工藝技術嘅知識及培訓。呢啲都係我嘅一貫主張。

香港現時面對勞動力短缺，唔止係缺乏高端嘅金融、科技及醫護人才，各類中層嘅技術人員，前線嘅技術工人都係好唔足夠。大部分香港家長都望子成龍，希望仔女唔止要入大學，就讀一啲熱門科目，最好仲可以攞埋碩士、博士、雙學位。不過，並唔係個個年青人都適合學術理論型嘅學科，有啲擅長做建造同設計，有啲鍾意廚藝煮食，同樣可以創一番事業，為行業同社會作出貢獻。

主席，我哋嘅教育制度，應該要做到行行出狀元，工字可出頭，無論讀邊一科都有發揮機會同事業前途。畀一啲DSE考得唔好，但同樣有上進心，肯學肯捱嘅青年人，有多幾條唔同嘅出路。本人僅此陳詞，支持原議案及各項修正案。