《2024年差餉(修訂)條例草案》二讀發言

主席，政府近年面對財赤，我喺最近幾年嘅預算案諮詢，都有建議同支持政府按照「能者多付」原則，喺唔嚴重影響一般市民生活同企業營商環境之下，適度調整某啲稅項同政府收費，從而增加政府庫房收入，以提供各類公共服務。

當中引入薪俸稅累進標準稅嘅立法建議，已於今年5月獲本會三讀通過。依家我哋審議緊嘅《2024年差餉(修訂)條例草案》，目的係引進累進差餉徵收制度，有關建議其實早幾年已提出討論，同樣符合「能者多付」、以及不會嚴重影響市民同企業嘅原則，因此我係支持嘅，亦都相信我哋G19會支持。

草案建議應課差餉租值55萬元或以下嘅住宅物業，差餉徵收率維持5%。租值超過55萬元嘅住宅物業，首55萬繼續都係收5%，多出嚟嘅租值就改為收取8%。如果租值係超過80萬元，喺80萬元以上嘅額外租值，就會按12%嘅徵收率嚟繳交差餉。

55萬元嘅應課差餉租值，係乜嘢概念呢？即係經差估署評估嘅每月租值約4.6萬元。當然超過有關租值嘅住宅單位，未必全部都可以叫做豪宅，但起碼唔係一般基層市民能夠負責同租住嘅物業。至於租值超過80萬元嘅住宅物業，即係每月租值不少於6.7萬元，個人認為經已屬於豪宅，唔係一般中產家庭嘅住所。

事實上，根據差估署數字，受到累進差餉制度影響嘅單位，全港現時約有4.2萬個，佔私人住宅單位約1.9%。即係有超過98%、絕大部分嘅市民同業主都唔受到影響，但估計每年可為庫房增加約8.4億元收入。

有人擔心一啲依賴出租物業維生嘅市民，尤其係長者，會受到今次修例影響。但大家應該了解，有關加幅係累進性質，只有高出限額嘅額外租值，先至需要收取較高嘅徵收率。以一個租值5萬元嘅單位為例，每年只係需要交多1,500元差餉，相當於每個月少於130元，影響應該有限。

另外，有人質疑點解剩係針對住宅物業，而唔一併調整租值較高嘅商場、寫字樓等非住宅物業嘅徵收率呢？係咪變成「重商輕民」呢？根據政府解釋，係因為非住宅物業嘅面積同租值，同租用有關物業嘅企業大小及盈利能力，往往並冇一定直接關係。故此喺其他實施累進差餉制度嘅國家同地區，例如新加坡，累進制都只係適用於住宅。

不過，我都希望政府繼續留意唔同地區嘅最新情況，睇下係咪可以喺非住宅物業，都引入某種形式嘅「強能多付」差餉制度。目的唔係純粹增加收入，而係探討能否以「貴加平減」嘅原則，適度調低租值較低嘅物業，包括住宅同非住宅物業嘅差餉徵收率，讓更多一般市民同中小企受惠。

亦有部分人憂慮，引入咗累進制之後，政府未來會否一唔夠錢使，就針對一啲有錢人同大業主開刀，不斷調高租值較高物業嘅徵收率。呢方面我個人唔太擔心，相信政府一定會考慮市民嘅承受能力同企業嘅營商環境。例如早幾年政府調高股票交易印花稅，但後來考慮到香港股票市場發展同相關企業最新面對嘅挑戰，政府好快就作出調整，將稅率還原。

主席，為咗落實累進差餉制度，差估署早前已增聘咗人手同更新咗電腦系統。因為工作量增加而增添人手，我個人係理解嘅，但我希望署方同事可以通過精簡程序同善用智能科技，減少增加人手嘅需求，同時保持工作同服務嘅質量。

差估署負責全港唔同類型物業嘅應課差餉租值評估，擁有包括物業嘅面積、用途、質素同狀況，仲有業主就租值評估進行上訴時提出嘅額外資料，呢啲都係相當龐大同有價值嘅數據。對於物業市場運作，市民作出買樓、賣樓、租樓等重要決定，以至政府制訂不同範疇嘅政策措施，都係非常有用。

差估署現時每年出版一份《香港物業報告》，每個月公布一次物業銷售及租金等統計數字，喺市場上最具公信力嘅官方數據。我覺得可以做得更好同更頻密，包括善用科技減少數據滯後嘅時間、提供更多最新市場嘅分析同未來供應嘅情況，喺符合保障個人私隱同商業敏感資料嘅原則下，公布更多相關原始數據，供社會各界參考同使用，促進物業市場更健康發展，減少因資訊不對稱造成嘅錯誤評估及投資。我希望局長考慮如何善用呢啲數據，尤其喺呢個大數據嘅年代。本人謹此陳詞，支持草案二讀同三讀。