《2024年撥款條例草案》(2024/25年度財政預算案)二讀發言

主席，政府近年面對財赤，今年預算案提出落實全面嘅「財政整合計劃」，以節流為重點，同時以務實態度增加部分收入，力求喺數年內回復收支平衡，有關原則同我提交嘅預算案建議書不謀而合。

「財政整合計劃」包括檢視政府基本工程嘅緩急優次，將有關開支控制喺可持續進行嘅水平。我同業界一直強調，基建工程唔係單純開支，而係對香港未來嘅投資，政府唔應該因為一時嘅財赤同經濟問題，而大幅減少對未來嘅投資，否則唔單止短中期嘅經濟同消費會進一步萎縮，長遠嘅房屋供應、交通運輸同產業發展等，都會受到影響。

預算案承諾會繼續推展一啲已相對成熟嘅項目，包括北部都會區嘅多項發展計劃，將中期嘅政府基建及建築工程開支，控制喺每年約900億元嘅水平，比起過去5年仍有百分之17嘅增長；政府亦計劃喺未來5年，每年發債約950億至1350億元，以推動北部都會區及其他工程項目，我係支持嘅。

因應財赤同樓市回軟，有部分人認為應該擱置交椅洲人工島計劃，我個人並唔認同。交椅洲人工島可為政府創造土地儲備，唔單止可用作建屋，對於推動各類產業發展，以及應對愈加迫切嘅舊區更新都好重要。

此外，隨着北都多個新發展區陸續展開收地同基建工程，每次向立法會申請撥款往往都係以百億元計，顯示發展現有嘅新界農地同棕地，其實未必比填海造地平同埋快，因為前者涉及居民安置同作業重置，喺興建交通基建方面，亦會受到不少現有發展掣肘。預算案提出會繼續推展人工島項目嘅相關研究，目標係喺現屆政府任期內進行填海，係務實嘅做法。

要妥善理財，政府除咗要檢視工程嘅推展優次，亦要更有效咁管控各個項目嘅造價成本。香港嘅建造成本係全亞洲最貴嘅，近日我出席咗一個座談會，指出可從4大因素分析香港建造費高昂嘅原因，包括建造器材同用料，人手供求與效率，發展及施工所需嘅時間，建築嘅設計同相關嘅政府政策、安全法規等等。

香港建築師學會近日進行咗調查，有不少建築師反映，佢哋有近4成嘅工作時間，係花咗喺填表、寫報告、同按程序申請各類審批。我亦多次指出，喺香港不論係起橋、起路，定係起樓，所需嘅時間往往係內地嘅幾倍，其實大部分時間係花咗喺前期嘅規劃同法定程序，真正嘅施工時間未必會慢過內地。不少承建商更表示，大量工程時間係用於等候政府部門批准開工、測試、檢查工程質量，以至完工、核准等，往往比實質工程建造仲要多，呢啲都大量增加咗工程嘅建造成本。

人手及效率方面，除咗輸入勞工以紓緩短期短缺情況，更重要係加強培訓本地人才同幫佢哋增值。預算案提出推展多個不同行業嘅人才培訓計劃，當中包括建造業界，主要針對前線及基層工人，做法係無可厚非，但我哋同時唔好忽略咗專業及技術人員面對嘅困難。另一個可以降低建造成本嘅，係善用創新科技，例如BIM同MiC技術，減少人手需求，亦可加快建築流程，提升工地安全，減少施工出錯同浪費。

相對於基建工程等非經常開支，政府更有必要嚴控經常開支增長。預算案提出繼續推行公務員編制零增長，以及各部門每年削減百分之一經常開支嘅「資源效率優化計劃」，大原則我係支持嘅。但效率優化唔係只睇數字，更重要係睇績效，要改變公務員各自為政，少做少錯，唔做唔錯，同埋後知後覺嘅官僚文化。最近嘅垃圾收費爭議就係一個例子，政府準備咗咁耐，請多咗咁多人，花多咗咁多錢，到依家仲係一鑊粥，令我同好多支持環保嘅人士係感到失望。

除咗直屬政府嘅決策局、部門開支同公務員編制，好多同樣使緊公帑嘅公營、法定及資助機構，佢哋嘅節流開源同提升效率空間可能更大，但負責監督有關機構嘅局同部門，往往畀人闊佬懶理嘅感覺，希望司長多加留意。

預算案建議檢視兩項涉及開支較大及增長迅速嘅交通費資助計劃，其實政府仲有兩項經常開支都係金額大，而且增長快，就係俗稱「生果金」嘅高齡津貼同長者生活津貼，單計去年就花多咗超過50億元，主因係長者多咗，以及政府近年多次放寬相關嘅申請資格同提高津貼金額。

我對最近幾年對政府施政嘅較大批評同失望之處，都係政府冇好嚴肅同全面咁應對香港嘅人口老化問題。人口老化一方面會令公共醫療及社福開支增加，另一方面亦影響勞動力嘅供應、政府稅收，以至消費市場。政府有需要帶領整個社會正視有關問題，及早籌謀，而唔係又等到問題爆煲然後先去補鑊。

作為負責任嘅政府，應致力促使長者活得更加健康，少啲病痛，從而減少政府嘅醫療同照顧服務開支。長者身體好，行得走得，唔使成日睇醫生，自然亦會多咗消費，有助推動銀髮經濟。

擁有健康嘅身體，不單止長者，而係所有人都需要，所以我係好支持預算案連續多年提高煙草稅，促使更多人戒煙，因為大家都知道吸煙危害健康，會增加患上多種危疾嘅機會。我亦支持推廣全民運動、健康飲食同作息定時，政府近年已開始做，但做得太少同太慢，希望相關工作今後能夠提速提效。本人謹此陳詞，支持《2024年撥款條例草案》二讀。