媒體

> 明報 > 道風山走中國風 謝偉銓解畫

道風山走中國風 謝偉銓解畫

【明報專訊】立法會建築、測量、都市規劃及園境界議員謝偉銓(Tony)不時喺facebook拍片,教大家建築小知識,今次佢就睇咗位於沙田嘅道風山基督教叢林。道風山係教堂,但建築特色就好似中式寺廟,連五餅二魚壁畫都係中式風格。Tony解釋,事緣1920至30年代,在華嘅教會希望拉近教堂同群眾嘅距離,當時唔少新建教會都摒棄西方教堂傳統風格,採用中國古典建築元素。

Tony又話,道風山用以做禮拜嘅聖殿,係仿照北京天壇祈年殿同埋瀋陽故宮大政殿而建,周星馳主演嘅《鹿鼎記》中抄鰲拜家一幕,都係喺道風山取景。Tony話銅鑼灣嘅聖馬利亞堂、宋王臺嘅聖三一堂都係類似風格,二戰後呢種建築形式逐漸唔再流行,道風山咁龐大嘅中國古典建築群就更加絕無僅有。