立法會

> 發言 > 《2019年成文法(雜項規定)條例草案》二讀發言

《2019年成文法(雜項規定)條例草案》二讀發言

主席,我係發言支持《2019年成文法(雜項規定)條例草案》二讀。今日原本係特首向立法會發表新一年度施政報告嘅日子,但由於港府向中央提出咗一系列支持香港經濟同民生嘅措施,需要特首稍後親自上京,與相關中央部委商討有關項目或政策嘅落實,特首喺本周一通知立法會,決定押後發表施政報告。

對於政府喺咁短時間內通知押後,的確係唔太理想,但我覺得最重要嘅係,相關惠港措施是否真正幫到市民,真正幫到香港重振經濟、改善民生,如果呢啲措施係幫到嘅,就延後幾個星期都係值得。

對於攬炒派議員批評,特首押後發表施政報告係無理拖延,影響經濟民生,名副其實係有口話人,冇口話自己。大家都睇到喺過去一年,真正嘅無理拖延嘅係攬炒派,包括令到上年度嘅立法會內務委員會,浪費咗超過七個月時間都選唔到主席。事件導致立法會嘅審議法案一度癱瘓,大量原本冇爭議嘅經濟民生法案遲遲無法通過,部分更被迫擱置。呢啲先係真正影響市民,損害香港嘅行為!

好似依家恢復二讀嘅《2019年成文法(雜項規定)條例草案》,內容主要係理順法庭程序,澄清法律字眼,希望可以加快處理俗稱「假難民」嘅免遣返聲請上訴案件。有關建議大部分都無爭議,獲得大部分議員支持,好快就完成審議,本應可以喺暑假前三讀通過,但因為攬炒派喺內會及大會發動拉布而胎死腹中,令到法院要耗費更多人手、時間同資源,去處理大量積壓嘅「假難民」案件。

香港過去幾年深受「假難民」問題困擾,好多來自南亞、東南亞,以至中東、非洲地區嘅人士,睇準香港重視人權、法治同程序公義,紛紛以合法或非法嘅途徑湧到香港,然後提出免遣返聲請,但其實佢哋絕大部分都並非因為受到政治迫害或酷刑對待先至來港。

佢哋嚟香港嘅目的,可能好主要係打黑工賺錢,部分人甚至被黑社會操控,從事違法活動,影響香港治安同合法居民嘅就業機會,並要由納稅人支付佢哋嘅生活費、律師費等開支。

喺保安局採取多項措施後,近年新來港嘅「假難民」已大幅減少,但仍有接近一萬人滯留咗喺度,透過不斷上訴及提出司法覆核拖延遣返。今次草案提出嘅其中一項改善措施,就係將高等法院上訴庭必須同時有三名法官在席嘅規定,放寬為只須有兩名法官就可以開庭審案。有關做法既能維持法治與程序公義,同時可加快處理相關案件,盡快將根本不合難民資格嘅「假難民」送走,因此我係支持嘅。

有關建議除咗針對免遣返聲請上訴案,亦適用於其他案件。我同其他議員過去曾多次批評,香港嘅司法制度除咗出名夠晒獨立,仲出名夠晒慢,好多刑事同民事案件都要排期好幾個月,甚至超過一年,先至可以正式開審同作出裁決。

不過,最近我見到司法機構同律政司似乎都積極咗,好多同反修例有關嘅案件陸續開審同宣判,令犯罪者盡快得以懲處,無罪嘅可以盡早釋放,公義得以喺合理時間內彰顯,呢一點對維護法治、止暴制亂,係非常重要。

除咗處理「假難民」之外,香港喺其他好多問題、好多方面都需要加快處理。我希望政府除咗要做好「監督者」嘅角色,亦要更積極扮演「促進者」嘅角色,唔好再事事議而不決、決而不行、磋跎歲月。

我亦好希望反對派嘅議員,既然佢哋選擇得留喺議會,繼續收取議員酬金同津貼,就應該好好利用未來幾個月時間,為市民做多啲實事,唔好再吓吓好似頭先咁打鐘拉布,唔好再攬炒。本人僅此陳詞。