立法會

> 發言 > 施政報告致謝動議第二輪發言

施政報告致謝動議第二輪發言

主席,喺呢一節,我會集中講土地房屋、簡化審批、宜居城市,以及環境同文物保育問題。

香港樓價高、租金貴,市民住得差、又住得細。即使有黑暴肆虐、美國制裁、同世紀疫情嘅三重打擊,私人住宅樓價依然冇乜點跌,公屋輪候時間卻愈嚟愈長,數以十萬市民被迫捱貴租、住劏房,基層上唔到樓、青年人、中產家庭上唔到車。香港土地及房屋供應不足,亦引發不少其他問題,包括貧富差距、青年問題,以至政治、管治同信心問題。所以解決土地房屋供應不足,係非常重要嘅。

要增加土地房屋供應,不外乎四度板斧,第一係填海造地、第二係重新分配土地用途、第三係地盡其用,增加發展密度、第四係善用現有嘅樓宇及樓面面積。

填海造地,係香港自開埠以來,一直廣泛採用嘅有效做法。唔計最新嘅東涌填海計劃,香港有超過67平方公里發展用地係填海得來,雖然佔香港整體面積約7%,但係就住咗超過四分之一嘅人口,容納咗超過七成嘅商業活動。

依家反對填海嘅人,好多本身就係住喺填海區,係填海計劃嘅受惠者,但對於政府建議進一步填海造地,以紓緩愈趨嚴重嘅土地房屋短缺問題、劏房問題,讓市民長遠可以住大啲、住鬆啲、住好啲,佢哋卻非理性咁反對,甚至連研究都唔畀做。

施政報告提出會繼續推進「明日大嶼願景」,進行規劃研究,我同大部分業界都支持嘅,但強調要做到「願景先行」、「以人為本」、低碳生活、發展與保育並重,以及有跨專業同市民嘅參與。發展局局長已答應咗會咁做,並會清楚寫入規劃研究裡面。

我希望政府再走多一步,用更簡潔、貼地嘅手法,向市民講解不同填海造地嘅益處,承諾可以令公屋輪候時間縮短幾多、新建嘅資助房屋可惠及多少個家庭民,以至全港市民嘅人均居住面積可增加幾多,等大家更容易感受到有關計劃對社會、對市民,以至對自己有咩好處,令大家真正覺得政府係「幫緊你!幫到你!」

將大型嘅覓地建屋計劃,與市民嘅上樓同上車時間掛勾,亦可令相關官員有更清晰嘅工作目標同成效指標,達唔到標就要解釋、追究,唔可以剩係話已努力做、盡快做、好畀心機做。

對於改劃土地用途同增加發展密度,包括發展農地、棕地,適度提高地積比率等,其實喺開支、成本方面,未必會比填海平,喺時間上分分鐘仲耐過填海,因為牽涉遷拆、賠償、安置,以及種種法定審批程序,仲要增加交通基建同社區配套,全部都要錢同時間。不過有關做法同填海並非互相排斥嘅,政府全部都要積極做、多管齊下加快去做。

主席,我喺2012年首次當選立法會議員時,已大力要求政府簡化及加快相關審批流程,政府其後亦答應咗做。今年施政報告提出,會特別著力精簡有關土地房屋發展嘅審批程序,包括成立「項目促進辦事處」、擴大「精簡發展管制督導小組」嘅職權範圍、引入「標準金額」補價先導計劃等,都係我同業界爭取多年嘅,依家終於成為政府嘅指導政策,對此我係深表支持同感謝,深信可以加快土地房屋供應。

不過,正如我喺首輪發言中指出,業界最擔心政府係咪講得出、做得到,同幾時先做到。我對發展局係有信心嘅,希望其他相關部門同政策局,都加把勁拆牆鬆綁,從而加快增加土地房屋供應。

提到精簡及加快發展審批,有人又會質疑係咪官商勾結、利益輸送,想明益某啲人。其實就算係攬炒派,過去都經常話要改善香港嘅營商環境,吸引多啲外資來港;唔通嗰啲外國公司來港,唔係為咗賺錢,係專程嚟做蝕本生意嘅咩?呢啲又算唔算係官商勾結、利益輸送呢?

不論係填海造地、改劃土地、增加基建,定係市區重建,都唔可能由政府做晒,必須同時借助市場力量,便利及促進私人發展。只要係多贏方案,對市民、對社會帶嚟效益,讓參與者取得合理回報係無可厚非嘅。政府唔應該船頭驚鬼、船尾驚賊,為咗避免一啲非理性嘅批評反對,就愈做愈慢、愈做愈縮,遇難避事!

不過,填海造地、發展棕地及農地等,動輒要花上十年甚至更長時間,難以迅速滿足現時逾26萬公屋申請人及超過10萬劏房家庭嘅住屋需要。因此我係好支持要增建過渡性房屋,以便喺短期內改善佢哋嘅居住環境,減輕其租金負擔。今屆政府提出3年內提供1.5萬個過渡性房屋單位嘅目標。斬下眼,依家已經係第四份施政報告,至今提供到幾多個單位呢?可以話係少之又少,希望運房局可以加把勁。

報告提議租用因疫而長期空置嘅酒店賓館做過渡性房屋,我認為係一個有創意同多贏嘅方案,希望政府快速做實際成果,唔好令到大批劏房家庭期望落空。

香港僭建、劏房林立,與政府強調嘅建設宜居城市、健康城市嘅目標背道而馳。我同業界多年來都關注香港樓宇老化、渠管失修滲漏、導致病毒傳播風險增加嘅問題,當中又以「三無大廈」同劏房單位嘅渠管亂駁問題最難處理。最近油麻地、深水埗等多區嘅舊樓群先後爆疫,可能就係源自劏房嘅擠迫環境、通風不足同違規改動渠管問題。

政府雖然已應我同業界建議,推出樓宇外牆渠管檢驗計劃,但做得太少同太慢。對於嗰啲無視法律、罔顧樓宇安全同公共衞生嘅劏房業主,對於嗰啲日久修、管理真空嘅「三無大廈」,政府檢驗完,教埋佢哋點整都冇用,最好辦法都係政府幫佢哋做。

社會近年有聲音要立法規管劏房,重推租金管制,對於呢啲違法違規、存在重大安全與衞生風險嘅劏房,係咪唔理咁多都要將佢合法化呢?係咪剩係平租就得,唔安全、唔衞生都照畀人住呢?如是,香港仲點樣成為宜居城市、健康城市呢?

主席,我同業界一直提倡發展與保育並重。文物保育方面,喺聖誕假期間曝光嘅深水埗主教山蓄水池事件,感謝發展局迅速回應,叫停工程,令呢項極具建築特色嘅百年古蹟,逃過被清拆嘅厄運。

政府今次喺補鑊、補救方面做得唔錯,但問題係事件根本唔應該發生,反映我喺首輪發言中指出,部分部門同公務員只懂按本子辦事,缺乏積極性同創造性嘅問題。希望政府可透過呢個難得嘅機會,將保育意識推廣到民間。

環保方面,今份施政報告預告會推出「廢物管理長遠策略藍圖」、本港首份「電動車普及化路線圖」、更新「香港清新空氣藍圖」、長遠達至「碳中和」等,全部都係長達二、三十年嘅計劃。呢啲都需要做、即時做,但對於急切嘅環保工作,更要快啲做、做快啲,尤其係喺源頭減廢及轉廢為能方面。

喺疫情之下,大家被迫改為買外賣同網購,用多咗好多膠盒同膠袋,市民亦都多咗喺屋企煮飯,理應係加緊推動塑膠同廚餘回收嘅好時機,只要處理得好,就唔怕傳播病毒。仲有係堆填區爆滿問題、善用已修復嘅堆填區用地等,搞咗十幾年都未解決、未做完。希望環境局都加把勁,迎難而上,切實跟進。

主席,辦法總比困難多,無論係對抗疫情,定係覓地建屋,只要大家都積極啲、走多步,上下同欲一齊做,冇問題係解決唔到嘅。本人僅此陳詞,支持議案。