主席,國家主席習近平喺「七一講話」,對特區政府提出「四點希望」,包括原議案提到嘅「着力提高治理水平」,同「切實排解民生憂難」。就「着力提高治理水平」,習主席強調政府「要轉變治理理念,把握好政府和市場的關係,把有為政府同高效市場更好結合起來」。呢番話對於我哋發展、建設業界,感受特別深。
香港嘅覓地建屋、發展同基建工程,喺回歸畀市民嘅感覺,係所需時間愈來愈長,愈做愈貴,唔少人都指出,原因之一就係部分負責審批嘅部門同官員,冇把握好政府同市場嘅關係,往往將私營業界放係對立面,好似但凡批准發展申請,就係「官商勾結」,「利益輸送」。結果導致唔少私營發展嘅審批申請困難重重,部分項目甚至被迫放棄,令到社會及市民利益受損。
政府當然要做好「監管者」嘅職責,確保各項私營發展符合法規,但政府同時亦要做好「促進者」嘅角色,促進、促成各類有利香港長遠發展,有助增加土地及房屋供應嘅項目,高效地落實「把有為政府同高效市場更好結合起來」。
習主席亦提到,「要加強政府管理,改進政府作風,樹立敢於擔當、善作善成新風尚,展現良政善治新氣象」。過往特區有部分官員,擔當不足,不善作為,遇難避事。當發展項目碰到困難,只會叫申請者自己去解決,去協調N咁多個部門,寫信又遲遲唔覆,約開會難過登天,拒絕申請又唔畀足理由,絕少主動協助申請者共同解決問題,甚或製造更多問題。「今時今日,咁嘅為官態度係唔夠架!」
要有效改變呢啲官員嘅心態,提高治理水平,習主席嘅另一次講話,我引述過好多次嘞,就係要「建立健全激勵機制,推動形成能者上、優者獎、庸者下、劣者汰的正確導向」。原議案提及嘅「知人善用」,以及公務員事務局近年推出嘅各項獎勵計劃,都係一種體現方法,但係就唔夠健全,尤其喺如何有效處理表現差劣嘅公務員方面,至今都未見具體嘅改善機制。
對於「切實排解民生憂難」,習主席指出,「當前香港最大的民心,就是盼望生活變得更好,盼望房子住得更寬敞一些」,政府要「拿出更果敢的魄力、更有效的舉措,破難而進」。
【餘下約140字】對於近日引起爭議嘅「簡約公屋」計劃,雖然可使用嘅時間比較短,涉及嘅公帑比較多,對有關地區嘅現有配套增加咗壓力,但係能夠幫到數以萬計嘅基層家庭,加快改善生活環境。難得政府官員展現出果敢魄力,破難而進,民有所呼,我有所應,因此我喺今早嘅工務小組會議投咗贊成票。本人謹此陳詞,支持原議案及各項修正案。