立法會

> 發言 > 《2022年發展(城市規劃、土地及工程)(雜項修訂)條例草案》修正案發言

《2022年發展(城市規劃、土地及工程)(雜項修訂)條例草案》修正案發言

主席,政府嘅修正案嘅一共有179項修正案,嚟緊我會集中回應有關《收回土地條例》嘅修正案。

草案原建議授權政府當局,將已收回作某種「公共用途」嘅土地,因應社會需求或整體規劃上嘅改變,永久改作另一種公共用途。例如近年香港適齡學童減少,唔少現有中小學都面臨「殺校」,有部分原先規劃咗做學校嘅收回土地,係咪可以改作其他更切合社區需要嘅用途,例如用嚟起公園、老人院、或者公眾停車場呢?聽落似乎係相當合理嘅。

不過,亦有不少人質疑,政府喺完成收地後先至改變用途,似乎有欺騙土地原有業權人同市民之嫌。有人更擔心,政府會唔會濫用有關權力,變相繞過正常收地所需嘅法定程序,將一啲本來屬於私人擁有嘅土地,以大部分人都支持嘅公共用途強制收回,之後卻突然改成為垃圾站、污水廠、或骨灰龕場等具爭議嘅用途,令市民冇咗提出意見同反對嘅機會。政府考慮咗有關意見,並衡量到需要動用呢項權力嘅機會其實好低,最後從善如流,刪除相關條文,我係支持嘅。

除咗永久改變用途,草案亦建議授權政府當局,可以臨時性、短期性咁,將已收回土地作為另一公共用途,例如做臨時停車場或過渡性房屋。大多數議員都支持有關建議,認為有助善用土地資源,但同時擔心相關臨時安排會否不斷延長,令區內居民遲遲未能享受到原定會興建嘅公共設施。為咗釋除疑慮,政府將規定有關臨時用途改動,一開始只可為期3年,之後每次最多亦只能續期兩年,並須諮詢區內人士意見,亦係從善如流嘅做法。

另一項爭議都係有關收地,就係未支付嘅收地補償金嘅利息計算。現行法例訂明嘅利息水平係不合理地低,草案建議將利息略為提高,部分議員認為仍然係偏低。但其實最多業權人同業界人士要求嘅,係政府應該盡早發放補償,而唔係畀多啲利息佢哋。我了解局長已從多個方面着手,希望可以盡早、盡快發放補償。

主席,其實呢3個問題係一脈相承嘅。如果政府當初收地時有做好規劃,諗清諗楚,收地後又盡快向受影響人士支付補償,盡早動工進行發展,就根本唔存在上述嘅改變用途同利息水平爭議。

講到尾,政府喺規劃、諮詢、收地、補償、以至項目嘅招標同實際施工方面,每一個環節都需要提效提速,咁樣先可以切實加快香港嘅發展速度,增加土地及房屋供應,避免將珍貴嘅土地資源浪費。本人謹此陳詞,支持政府提出嘅各項修正案。