主席，我一直好關注同支持香港嘅創新科技發展，尤其係涉及發展、建設領域嘅設施產品同創新研發應用，以及智慧城市嘅建設同管理。不過，香港近年相關嘅創科發展，比起內地不少大城市都係相對緩慢。
今年4月行政長官率領立法會考察團訪問大灣區，令我更能深入咁了解到內地最新嘅建築機械人技術，喺縮短施工時間、提升工程質量、減少人手需求同防範工業意外等方面嘅優異表現。
今年7月，我組織咗一批我代嘅建測規園界人士出訪成都，考察當地嘅新能源交通運輸系統，睇到內地唔單止喺科技硬件同建設技術方面突飛猛進，喺城市規劃同交通管理等軟件上嘅發展亦係相當超前，為民眾帶來更加便捷、舒適、安全、環保、而且性價比高嘅公共交通服務。
返港後我喺報章多次撰文，提出特區政府喺交通大數據嘅收集同應用、新一代綜合運輸交匯樞紐嘅規劃同建設，以及引入中運載量嘅智能環保公交系統等多個範疇，應更多借鑑成都同其他內地城市嘅成功經驗。
*香港嘅發展工程建造及交通運輸業界，近年亦有嘗試引入內地或其他地區嘅創科產品同技術，並期望得到特區政府嘅協助同支持。唔再好似以前過去畀大家嘅感覺，喺引進新科技、新做法同新建材，政府嘅審批往往變成最大嘅障礙。包括要求不斷做測試、不斷提交文件證明，但其實有關產品同技術，早已喺內地做足測試，取得認證，並落地應用咗好一段時間。*部分內地產品更係已攞埋歐盟認證，喺多個歐洲國家用緊，但想取得港府認證，相對於來自美國、歐洲同日本嘅產品卻特別困難。
過去幾年我處理過唔少類似嘅申訴同求助。有關業界人士同進口商，都好明白某啲非本地嘅創科產品同技術，喺引進香港時係需要進行一定嘅測試同審批，有時候要根據香港嘅獨特環境同法規而作出調整，但相關部門係咪可以做得再快啲、積極啲呢？
*政府官員唔止係監管者，亦要做好促進者、促成者嘅角色。唔好剩係話畀申請人聽「申請不獲批准」，而係要講埋點解唔批，以及提示點樣先可以批到，咁樣香港嘅創科發展同應用先至有望加快，同時有助加強本地研發嘅動力。*
正如習近平主席喺去年訪港考察香港嘅創科發展時指出，國家已將支持香港建設國際創科中心納入「十四五」規劃，對香港有很高的期望。*香港唔止需要創新嘅科技，更要有創新嘅審批程序同認證制度，突破固有嘅官僚文化同思維，更好發揮香港喺知識產權法律保障嘅優勢。做到習主席提出嘅，「將有為政府與高效市場更好結合」，不斷增強香港嘅發展動能，切實解決民生憂難。*
本人謹此陳詞，支持原議案同各項修正案。