立法會

> 發言 > 「完善支援家庭的政策和措施」議案

「完善支援家庭的政策和措施」議案

主席,同不少已發展嘅大城市一樣,香港嘅離婚率持續上升,引發種種社會問題。喺2018年同今年年初,我先後就政府對單親家庭嘅支援措施,喺立法會提出質詢。香港近年出現勞動力短缺,我亦關注如何透過加強托兒服務同推動家庭友善嘅職場環境,鼓勵更多單親家庭嘅父母投入社會工作。原議案提及嘅共享親職教育,協助離異父母求同存異,合作教養子女,亦係相當值得支持,有助單親家庭子女健康成長,發展成才。

相較於喺夫婦離異後再加以援助,好多人認為更重要係加強婚姻輔導服務,預防同化解婚姻家庭矛盾,減少家庭暴力同離婚個案。現時要尋求婚姻輔導,私營嘅收費相當高,未必係一般基層市民可以負擔。獲資助嘅服務就好難預約,尤其係夜間同周六日、打工仔唔使返工嘅時段。希望政府同相關機構可以加強有關服務。

不過有唔少人認為,當下香港面對嘅更大問題,係好多年青人根本唔肯結婚,唔想生兒育女,令港人嘅生育率屢創新低,加劇人口老化同勞動力不足。

施政報告採納咗我哋G19嘅建議,推出「組合拳」鼓勵港人生育,包括派發2萬元現金,加快申請公營房屋同提供稅務優惠等,都係值得支持,但我覺得仲係未夠。報告就多項不同嘅政策措施,提出制訂發展藍圖同行動綱領,增設專責辦公室同專員職位,設定績效指標等等,但對於鼓勵港人生育,就沒有相關嘅藍圖或綱領。

當年家計會嘅宣傳片,例如《兩個就夠晒數》呢首歌曲,可謂深入民心,而且影響至今。依家政策轉為鼓勵生育,就唔見有類似嘅宣傳。唔少人接觸到嘅,反而係「同樂運動會」嘅宣傳攻勢,又唔見政府作出反宣傳,鞏固番一夫一妻制嘅家庭價值觀。

有人提議政府成立一個鼓勵生育委員會,統籌協調各個政策局同部門嘅相關政策措施。睇番人口老化同「少子化」亦極為嚴重嘅日本、南韓等地,佢哋唔單止成立專責部門去鼓勵生育,仲會推出種種資助計劃同支援措施,去鼓勵國民拍拖、結婚及生兒育女,以緩解生育率過低嘅危機。

特區政府喺呢方面就相對欠缺主動性、積極性、同預示性,好似要等到問題「爆煲」,港人生育率跌至全球最低,人口持續下跌,先至肯正視同處理。希望政府其實唔係咁被動嘅,會積極加強支援現有嘅家庭,以及採取更多措施,支持我哋嘅年輕一代組織新家庭,支持佢哋生兒育女。本人謹此陳詞,支持原議案及修正案。