主席，香港無處不旅遊，我同不少市民一樣，都係喺之前疫情期間，困住咗喺香港，先至察覺到香港原來係有咁多好去處。當時我以慶祝回歸二十五周年嘅名義，先後組織咗7場本地考察活動，畀我代表嘅建測規園界人士報名參加，場場都超額爆滿，大家嘅評價亦好好，因為所有嘅景點都好有特色。
其中幾個景點，都係已獲評級同活化嘅歷史文化建築，包括當時剛剛修復好嘅薄鳧(夫)林牧場、以前做過醫院及隔離設施嘅饒宗頤文化館、改作芝加哥大學香港分校嘅摩星嶺白屋、仲有差啲畀政府填平咗嘅主教山配水庫，都係好有歷史價值同建築特色。有傳統嘅中式建築，有啲富有殖民地色彩，有更多係中西合璧，加入咗一啲香港本土嘅元素，係旅客「打卡」同認識香港獨特歷史文化嘅好去處。
香港現時有134項法定古蹟，近200項一級歷史建築，二級同三級歷史建築加埋更有過千項，係相當豐富嘅旅遊資源，但有好多都長期被忽略，好少人知，好少人去。除咗因為部分古蹟位置偏遠，政府過往嘅「保而不育」政策亦係原因之一。有啲歷史建築物，搵個鐵絲網圍住佢，加個指示牌，就係叫做保護咗嘞，冇好好咁活化同加以宣傳，亦缺乏其他旅遊配套，未能發揮經濟效益及協同效應。
現已去到第7期嘅「活化歷史建築伙伴計劃」，希望借助非牟利機構嘅力量，去善用有關歷史建築物，當中有一啲成功嘅個案，但亦有唔少失敗嘅例子。過去我多次向政府表達，係咪可以喺相關建築法規同審批程序方面拆牆鬆綁，善用更多私人同商業機構嘅力量，將歷史、文化、同旅遊三者更好結合，加強計劃產生嘅經濟效益，發展文化歷史深度遊，協助香港吸引多啲旅客，加深海外、內地、以至本地人，對香港歷史及中華文化嘅認識。
除咗歷史文化建築，疫情期間，我同業界亦去咗一啲鄉郊地方旅遊考察，包括劉業強議員修正案提到嘅沙頭角地區。嗰度有好美麗嘅自然環境，亦有獨特嘅歷史文化，又可以坐船出海環島遊，最可惜係入唔到中英街參觀。我哋亦注意到，部分島嶼同鄉村嘅基礎設施同旅遊配套不足，包括水、電、排污、道路、廁所、Wifi、露營及住宿等等，未能充份發揮有關景點嘅效益。
【餘下約130字】立法會早前討論「南大嶼生態康樂走廊」倡議，以及前南丫島石礦場嘅發展，大家都係關心呢啲問題。相關旅遊基建設施，必須要由政府主動做，積極推，再善用私人市場嘅力量，先至會見到成果。否則再講多10年，再諮詢多10次，都係「煲冇米粥」。本人謹此陳詞，支持原議案及各項修正案。