主席，香港由開埠初期嘅轉口港，之後發展製造業，其後國家推行改革開放，大量港商到內地投資設廠，推動香港轉型成為國際貿易、航運同金融中心，好多公司早已喺內地同海外，建立咗相當完善嘅產業鏈同供應鏈。有啲大企業更係由原材料、零部件、產品嘅開發、製造、銷售、以至運輸物流一條龍都做晒。咁點解今日我哋仲要討論呢個「構建香港成為跨國供應鏈管理中心」議案呢？我認為其中一個主因，係近年嘅國際貿易同內地產業環境，出現咗一啲頗為根本性嘅變化。
喺國際方面，以美國為首嘅西方國家，為咗自身嘅政治同商業利益，近年以國家安全同「產能過剩」等藉口，對我國實施種種貿易制裁，尤其係涉及創新科技嘅領域，令到原有嘅跨國產業鏈同供應鏈，出現咗「脫鉤斷鏈」嘅危機，威脅到香港長期作為內地同西方之間嘅「超級聯繫人」角色。
喺內地方面，隨着經濟持續發展，企業做大做強，唔單止好多內地產品嘅質量已做到同國際標準接軌，好多內地企業喺海外營銷、推廣、以至集資、投資方面，亦已做到直接同國際接軌；再加上內地民眾嘅消費水平提高，電商及網購大行其道，國家加強推動「內循環經濟」等等，都令到好多香港企業同專業服務業過往用開、做開嘅跨國產業鏈同供應鏈，出現咗相當大嘅變化。
喺中美貿易戰爆發初期，有部分香港嘅企業同商家，以為呢個只係一時嘅政治風浪，好快就會過去；有啲企業更嘗試「去中國化」，對外強調自己係香港公司，唔係中國公司，希望可以避過歐美嘅制裁，沿用舊有嘅營商網絡同模式。但事實證明歐美對我國嘅打壓係長期性嘅，並且不斷咁變本加厲。香港作為中國不可分割嘅一部分，係冇可能完全唔受影響。
面對以上似乎係不可抗逆嘅變化，香港嘅企業同專業服務業，未來係咪就會冇運行呢？我係唔認同嘅。首先，內地經濟嘅持續發展，最新嘅「新質生產力」倡議，本身就可以為香港各行各業，帶嚟龐大嘅發展機遇。
此外，雖然我國亦有對歐美嘅無理打壓，作出一啲必要嘅反制裁措施，但大方向仍係維持「高水平開放」，歡迎來自世界各地嘅商品、買家同投資者，並會繼續大力推展「一帶一路」倡議，為內地同本港嘅企業及專業服務創造更多商機。
故此，香港嘅業界只要能夠與時並進，乘勢轉型，更好地發揮特區「背靠祖國、聯通國際」嘅獨特優勢，更積極咁開拓包括東盟、中東等「一帶一路」地區，同善用國家嘅龐大市場，通過特區政府各個局同部門嘅前瞻帶動，更有效咁協助國家「引進來、走出去」，發展前景仍然係相當遼闊嘅。本人謹此陳詞，支持廖長江議員嘅原議案同各項修正案。