主席，正如我喺二讀發言指出，我係完全支持今次修例，改革社工註冊局嘅組成同行事方式，提升註冊社工嘅操守同專業性。不過喺審議過程中，我同多位議員都有草案嘅多方面內容，提出咗唔少意見。好高興政府亦從善如流，採納咗議員嘅多項建議，提出修訂，為註冊局嘅有效運作，以及維護國家安全嘅工作，提供更有力嘅保障。
首先係有關註冊局成員嘅組成同產生方法。草案建議將成員人數由現時15人增加至27人，當中會保留全部8名由選舉產生嘅註冊社工成員，其餘就由行政長官委任，改組後嘅註冊社工人數仍然佔整體成員數目超過一半。
草案原建議註冊局嘅正副主席，係由成員之間互選產生。但我同其他法案委員會委員都認為，正副主席肩負制訂開會時間同議程等重要職能，喺其他不少類似嘅專業同行業法定機構，例如我做過主席嘅物業管理業監管局，仲有地監局、旅監局、會計及財務匯報局等等，佢哋嘅正副主席人選都係由特首委任，睇唔到有好特別嘅理由，點解社工註冊局會有唔同做法。局長因應議員建議提出修訂，訂明將來嘅註冊局正副主席將會由特首委任，我覺得係更加穩妥同符合現代專業規管標準嘅做法。
草案要求註冊局成員宣誓擁護《基本法》同效忠香港特區，係首個專業法定機構引入相關規定，引起咗一啲爭議。我個人認為其實係冇乜好爭議嘅，作為一個中國人同香港居民，擔任有關重要嘅法定公職，擁護《基本法》同效忠特區係天經地義。
草案原建議有關宣誓程序會以書面簽署方式進行，有議員認為註冊局人數又唔多，應唔難安排以親身方式宣誓，建議政府就此提出修訂。對於具體嘅宣誓形式，我個人意見不大，因為最緊要係真誠咁宣誓，真心咁效忠。但估唔到有關修訂，間接引發咗多位現任民選註冊局成員辭職，某程度印證過去佢哋對效忠特區同擁護《基本法》嘅抗拒。
最後係有關「逃生門」嘅問題。有別於其他部分專業，都訂明曾經干犯嚴重刑事罪行嘅人士不能夠註冊；有唔少註冊社工，可能喺年輕時犯過錯、吸過毒、或者入過黑社會，佢哋喺服刑後改過自新，並且成為社工，協助其他人遠離毒品同罪惡。因此現行嘅社工註冊條例，係特別設有一個「逃生門」嘅機制，訂明若能取得全體註冊局成員一致同意，干犯過某啲嚴重罪行嘅更生人士，仍然有資格註冊或繼續註冊成為社工。
不過，對於被裁定危害國家安全罪行嘅社工，法案委員會成員就一致認為唔應該適用有關機制，應該斬釘截鐵咁，即時取消佢哋嘅社工資格。我認同有關做法係更為明確同合適，所以我會支持有關修正案，以及局長提出嘅其他修訂。本人謹此陳詞。