主席，我一向係職業專才教育嘅支持者，我本身係讀工業中學出身，接受工藝培訓，之後考入當時仲未升格做大學嘅理工學院，同當年好多香港青年人一樣邊做邊學，考取專業資格。我代表嘅建測規園界同建造業界，亦有好多人支持職專教育，因為近年唔止專業職位人手不足，前線人員、尤其技術人員更係特別缺人，間接導致建造成本上升，延長咗香港嘅建設同發展項目嘅時間。
政府近年已做多咗唔少工作，去加強職專教育同學生嘅生涯規劃，包括喺高中引入「應用學習課程」，推動成立「應用科學大學」等。當局亦投放咗唔少資源，資助不同院校開辦各類職專課程，但業界普遍覺得成效只屬一般。包括有部分課程嘅收生情況欠佳；有啲學生讀完又唔係做番嗰行，兜兜轉轉都搵唔到合適嘅工作；有啲課程多年來都未獲相關專業團體或行業承認，對就讀學生造成打擊；亦有僱主批評部分職專課程嘅內容，未能與行業操作接軌。
主席，我唔係教育專家，但都歸納到香港職專教育嘅三大優化、改革嘅方向。第一係加強學校同相關行業、企業、同專業嘅合作，確保課程能夠學以致用，同市場及行業接軌，提升相關資格、學歷嘅認受性。其中一個有效方法，係搵多啲真正嘅業界人士任教，以及畀學生有多啲機會，直接去到有關企業同場所工作實習，實地培訓。過程中，政府可能要向相關學生同企業提供一啲資助，以提升佢哋參與誘因。
第二係提高社會對職專教育嘅認知及認同，尤其係喺家長層面。要佢哋明白「行行出狀元」、「工字可出頭」嘅道理，要接受唔係每個學生，都適合同有能力做醫生、金融或者創科等專才，亦唔係攞多幾個碩士或博士學位頭銜，去外國浸過咸水，先至會生活得開開心心，同搵到合適、高薪嘅工作。
第三係提升一啲藍領行業同技術型、工藝型工種嘅社會地位。香港嘅建造業界近年做咗大量工作，去提升行業嘅形象。除咗講人工同前景，亦有強調女性都可以參與同上位，創新科技嘅應用等等，已見到一定成效。未來要進一步喺工業安全方面下功夫，令建造業唔再畀人感覺好易出意外嘅行業，不然就難以吸引更多年青人入行。
主席，由於人口老化及生育率偏低，香港好多行業都面對人手不足、從業員老化同生產力下降問題，喺中短期輸入外勞係有需要嘅，但長遠我都一直強調要加緊培育同留住本地人才，以及喺各行各業都加強科技應用，提升工作績效，因此我哋嘅職專教育必須更加積極進取，與時並進，希望政府同各院校可以做好啲。本人謹此陳詞，支持原議案同修正案。