主席，首先要借呢個機會，感謝發展局局長及一眾局方官員，尤其係何珮玲常任秘書長，喺過去兩年來一直努力不懈，推動香港有關土地發展同管理嘅法例不斷優化完善。除咗剛剛通過二讀嘅強拍修訂條例，仲有先後喺去年同上個月三讀通過，有關精簡發展法定程序同土地契約續期嘅法案，嚟緊仲有一條《保護港海(修訂)條例草案》即將進行首讀，全部都對香港嘅發展建設，起到重要嘅促進作用。
如同之前兩條法案，政府喺立法會審議今次強拍修訂條例時，用咗大量圖表同例子向議員及公眾解說，有效咁澄清咗外界嘅一啲誤解，同時因應議員同業界嘅一啲建議同意見，從善如流，提出修訂，令法例更趨完善，更能照顧到各方嘅利益同關注，但亦唔會因為社會上有不同意見就議而不決，遇難避事。局方實事求是嘅表現，係值得議員同市民讚賞。對於局長動議嘅各項修正案，我都會支持嘅。
正如我喺二讀發言指出，為咗加快香港嘅市區更新工作，政府最初係提議將全港樓齡50年或以上樓宇嘅強拍門檻，一刀切咁降至7成至6成。但因應部分市民，尤其係可能受修例影響嘅小業主嘅憂慮，政府最終決定將最低嘅強拍門檻提高番至6成半，並且引入不同地區有不同門檻嘅做法，展現咗政策嘅彈性同平衡咗各方嘅利益。
對於狄志遠議員提出修訂，建議將「非指定地區」嘅舊樓強拍門檻，還原至修例前嘅水平，此舉將會大大削弱今次改革可帶嚟嘅效益。須知樓宇老化問題係全港性嘅現象，根據 2022年底嘅數據，樓齡介乎60至 69年嘅私人樓宇，全港有超過2,600幢，當中超過一半係位於「非指定地區」。有啲樓宇即使落成只有50多年，因為長期管理不善，日久失修，更有逼切性需要重建。
狄議員嘅另一項修訂建議，係將位於非工業地帶、樓齡達30年以上嘅工廈嘅強拍門檻，還原番去現時嘅最少8成，有關建議我係反對嘅。工廈嘅重建同住宅樓宇係有本質上嘅分別，未必單係因為有關樓宇本身好殘好舊，而係為咗配合經濟轉型同社會變遷，希望有關土地可以地盡其用，與時並進，藉此推動產業同新經濟嘅發展。
部分舊式工廈因為業權分散，唔好話整幢拆卸重建，就連以改建方式活化，成功例子都係少之又少。已經同時代需要脫節嘅工廈遲遲未能重建，一係變成十室九空，浪費咗珍貴嘅土地資源，窒礙咗一啲新產業嘅發展，包括最近我同G19嘅科技創新界邱達根議員，一同大力推動嘅數據中心、超算中心；一係就會助長咗一啲違規、違法嘅使用，例如改做經營劏房，造成種種公共安全同衞生隱患。因此我會反對狄議員嘅修訂。本人謹此陳詞。