主席，過往我批評政府對人口老化問題應對不足，缺乏前瞻，今年施政報告有明顯改進，包括成立「促進銀髮經濟工作組」及定下5大工作方向，尤其係當中嘅「銀色財務及保障安排」同「銀色生產動力」。我以前都講過，香港有唔少長者其實並唔需要、亦唔想靠政府，有部分長者仍然有心有力，希望以不同方式繼續貢獻社會，政府需要向佢哋提供嘅係便利，唔係福利。
施政報告提出進一步推動「灣區安老」，我亦係一直支持。以前香港長者喺內地最擔心醫療問題，但依家內地各類醫療同保健服務不斷提升，部分3甲醫院已引入港式管理，相信以前憂慮嘅問題將會愈嚟愈細。
教育方面，「高才通」等輸入人才計劃，為香港帶嚟為數不少嘅適齡學童，但佢哋一般希望入讀本來已「爭崩頭」嘅傳統名校，幫唔到因種種問題而收生不足嘅弱勢學校。有關情況唔單止造成教育資源錯配，亦可能會引發本地家長與外來專才之間嘅矛盾。
我一直認為教育政策亦需要配合市場，重視效益同家長嘅選擇，通過汰弱留強嚟不斷求進。面對學額錯配問題，係咪可以鼓勵啲做得好、受歡迎嘅學校，以類似收購合併嘅方式，善用收生不足學校嘅校舍及師資等資源，以便更迅速咁增加學額呢？比起不斷咁縮班、殺校，對學生、家長同教師係咪更有利呢？
此外，我再次促請政府加強中小學及幼稚園，有關中國傳統文化同倫理道德嘅教育。唔需要獨立成科嘅，更有效係融入不同學科及校園生活之中。例如加強對中國傳統節慶，以及其背後嘅歷史故事同人物嘅認識，唔係只重視西方嘅節日等。希望教育局，整個教育界，都能夠識變、應變、求變，增強學生對中國傳統文化嘅認識同喜愛。
最後講下環保問題，垃圾徵費建議暫緩推行，但源頭減廢工作不能半途而廢。加強公眾教育，除咗減廢仲有減排，要強調應對極端天氣，人人有責。要做好硬件套配，除咗各類回收設施、廚餘收集系統，仲要增建焚化設施，轉廢為能。無論係喺善用土地、節省公帑、定係改善居住環境等角度，香港係冇空間再擴建堆填區。
《2024年施政報告》致謝議案主席，本人謹此陳詞，支持施政報告致謝議案。