主席，感謝有6位議員就我嘅議案提出修訂，以及其他一共XX位議員發言，反映大家都好重視香港嘅土地政策，以及土地同經濟、產業發展嘅重要性同關連，所有修訂建議我都係支持嘅。
首先係龍漢標議員嘅修正案，加入咗「適度放寬規劃限制、改善土地契約修訂標準金額補地價安排，以及進一步精簡土地房屋發展審批嘅行政程序」。呢幾點已係我哋發展及建造業界嘅共識，亦係我多年來不斷向政府提出嘅建議，所以我當然會支持。
吳秋北議員強調政府要「加強土地政策嘅主導權、制訂計劃及指標增加土地儲備，讓發展成果更多、更公平咁惠及全體市民」，亦係我一貫嘅主張。政府要配合市場變化，促進市場發展，善用市場力量，但不能夠完全依賴自由市場，喪失咗管理及開發土地嘅主導權。關鍵之一係要有一定嘅土地儲備，喺市場供求失衡嘅時候，迅速作出調節。
陳月明議員要求「集中資源優先推動北部都會區發展」。我同意喺財赤之下，政府可以因應不同項目嘅重要性同成熟程度，適度咁調整其推展時間同優次，但我必須強調，政府不應只集中做北都，要同時適時推展其他造地計劃，包括擱置交椅洲人工島及其他近岸填海計劃。開發新界土地同填海造地，其實係各有各嘅困難，同時亦各有各嘅好處，開發時間同造價成本亦相差唔遠，唔應該係對立或只能二擇其一。
劉國勳議員嘅修正案，對我嘅原議案加以補充，當中包括精簡發展流程、加強公私營合作、研究多元化嘅土地發展模式、引入「片區開發」等等，部分建議我尋日發言時都提過。
至於「成立專責機構負責整合和發展土地，並參與策略性項目發展」，今年施政報告亦有提出類似嘅建議，喺北都揀選一啲試點產業園區，由政府成立公司去發展同管理，當中可以考慮接受外界嘅策略性投資。如同「片區開發」模式，我都係支持嘅，但認為成功嘅關鍵，在於政府要做好跨局、跨部門嘅統籌協作，同前瞻性嘅領導工作。同時，唔好以為有咗新嘅架構、或者新嘅公司，佢哋自自然然就會做得更好，負責有關工作嘅官員就可以翹埋雙手，坐享其成。
對於G19嘅簡慧敏議員，以及來自我哋建測規園業界嘅林筱魯議員嘅修正案，對我嘅議案作出咗補足，我都會支持嘅。本人謹此陳詞。