主席，我發言支持尚海龍議員提出嘅「跟進新來港人才融入香港措施」議案，以及兩項議員修正案。尤其係我哋G19嘅嚴剛議員提出嘅修訂，強調要「厚植」新來港人才嘅愛港情懷，引導各類人才樹立長期扎根香港、服務香港嘅信念，等佢哋喺香港安居樂業，形成「虹吸」效應，吸引更多優秀嘅人才來港。
呢幾點我覺得係非常重要嘅，唔係純粹視香港作為一個保險或者跳板，喺取得香港永久居民身份之後就返番去內地，又或者攞咗本特區護照之後就轉往其他國家發展，而係最重要嘅，視香港為家，為特區嘅發展同建設作出貢獻。
主席，我都係喺內地出生，係一位「資深港漂」，漂下漂下，就漂咗幾十年喇，喺香港畢業、工作、考取專業資格，結婚同生兒育女，成為一個地地道道嘅香港人，同時亦係不折不扣嘅中國人，為香港、為國家嘅發展出一分力，無分優次，也無矛盾。
由我擔任召集人嘅立法會G19，喺2年多之前，向政府提交主題為《全面檢視及落實人口和人才政策》嘅共同倡議。好高興當中大部分建議，已先後獲特區政府採納同落實，包括推出多項計劃同措施，積極招商引才、放寬本地大學招收非本地學生嘅限制。
剛於上周發表嘅施政報告，亦宣布會放寬「資本投資者入境計劃」，容許投資移民將一部分豪宅物業嘅樓價，計算入計劃內嘅指定投資額，以及放寬全日制非本地本科生兼職工作、鼓勵將酒店及商廈改作學生宿舍用途等等，都係G19同我有份提出嘅，有助香港進一步吸引人才、留住人才，以及引導呢啲內地同海外人才長期扎根香港、服務香港。
主席，早前我收到業界求助，佢間公司想為僱用開嘅內地專才續期，留港工作，但唔知係咪因為同一時間要處理嘅個案太多，入境處喺限期屆滿前做唔切。最後有關公司被迫暫停有關工作，否則就會變成聘用非法勞工。我覺得有關情況係好唔理想，如果純粹係因為當局處理需時，點解唔可以臨時、自動咁延長簽證呢？
最近有多間本地大學，都揭發有內地及海外學生使用假學歷報讀嘅問題。另外亦不時有報道指出，包括「高才通」等各類輸入人才計劃，都存在一啲懷疑使用假學歷、假資歷、假地址、同假受僱嘅個案。入境處、教育局同勞福局等相關部門，都有必要加強打假，從嚴檢控，尤其係從源頭打擊「黑中介」嘅問題。但當局亦唔好因為一小撮嘅不法分子，而搞到有關程序同手續過份繁複，障礙咗真心來港發展及貢獻嘅海內外人才。主席，本人謹此陳詞。