主席，本人發言支持《香港合資格環保專業人員學會條例草案》二讀。對於香港嘅環境保護工作，我同建測規園業界一向都非常重視。「環專會」致力推動嘅6大領域，包括環境政策、空氣、噪音、環境影響評估、廢物同水質，都同我哋界別嘅專業工作息息相關。事實上，唔少建測規園界嘅專業人士同公司，現時都有參與相關嘅環保專業工作。
故此，對於「環專會」通過盧偉國議員提出呢條私人草案，賦予該會法律認可地位，從而提升香港嘅環保工作同相關從業員嘅專業性，我係支持嘅。我亦有參與草案嘅詳細審議工作，為完善草案內容同促進學會嘅未來運作及發展提出一啲意見。
草案條文並唔算複雜，主要參考咗其他現有法定專業學會嘅相關條例，大部分會務細節、會員資格等，都寫咗喺學會現行嘅章程同規則裡面，冇放到入主體法例。有意見認為，作為一個獲法律認可嘅組織，應將更多主要嘅會務運作規章寫入法例，以便公眾及議員監察。但由於草案並冇賦予「環專會」額外嘅法定權力，亦唔係將佢變成一個法定嘅發牌監管機構，我認為現時建議嘅做法係合適嘅，可以方便學會更靈活及適時咁，按需要修改會章。
我喺草案審議期間反而提出，「環專會」應盡快為其章程及規則制訂中文譯本。香港不少嘅專業學會，以至行業協會、商會等等，佢哋嘅章程、附例及內務規則，我理解有好多都只得英文版。部分即使有中文版，都係只供參考嘅譯本。
背後嘅理由唔少，有啲係有歷史原因，亦有啲係因為交畀咗律師處理，而香港嘅律師主要係用英文起草，寫多份中文版要另外收費。不過，為咗方便全港大部分市民、以及內地嘅相關對口單位，利便將來進行資格互認同融入國家發展，我覺得中文版嘅章程亦有必要嘅，我感謝「環專會」已答應跟進，亦希望同其他團體都會咁做，為佢哋嘅章程、規則等等，制訂同等嘅中英文本。
主席，我近年亦有參與一啲行業、專業組織嘅籌組同成立工作，單係處理草擬章程、公司註冊、銀行開戶等等，所需嘅時間已往往以年計，要出錢、出力、出心、出時間，係絕對唔容易嘅。
在此要感謝盧偉國議員，以及一眾「環專會」領導層同創會成員嘅付出，並希望有關當局可以精簡相關程序，加快審批工作。我亦期望喺草案通過後「環專會」會加倍努力，提升香港環保專業工作嘅質量同相關標準，協助香港培訓更多環保專業人才，為香港、以至國家嘅環保工作，作出貢獻。本人謹此陳詞。