主席，本人發言支持，由我哋G19嘅陳曼琪議員提出，有關「研究及檢討《淫褻及不雅物品管制條例》，鼓勵推動建設良好家庭家教家風的公眾教育及宣傳」嘅議案。對於同樣來自G19嘅梁毓偉議員提出嘅修正案，我都係支持嘅。
主席，我一直強調政府施政必須與時並進，不斷改革，包括不時檢視同革新一啲經已過時嘅法例同制度。現行嘅《淫褻及不雅物品管制條例》同淫褻物品審裁處制度，當初制訂時主要係針對電影、電視、報刊等舊時代嘅媒體，對於新時代嘅網絡資訊，包括各類手機通訊程式、短片分享平台等等，名義上都有涵蓋，但實際上就係管唔到、管唔好，間接導致網上嘅淫褻及不雅資訊氾濫，不斷荼毒我哋嘅兒童及青少年，有必要好似原議案建議咁作出檢討，包括評審機制同相關準則，以及加強相關執法部門嘅巡查及執法力度。當中包括利用一啲自動辨識網上不良資訊嘅科技，主動出擊，加密、加強對互聯網供應商嘅監管，而唔係好似以前咁被動，有人投訴先至做嘢，有人將物品送檢先至開會審查，未能跟上瞬息萬變嘅時代發展。
有人擔心，政府加強網絡巡查同執法，會唔會變成打壓資訊及言論自由。但事實上，經常將人權自由掛在嘴邊嘅多個西方國家，近年亦紛紛立法加強管控網上資訊，包括針對AI生成影像，以及容易令到青少年上癮嘅網絡演算法。香港現時情況實在太過自由放任，好似完全無王管。
除咗明顯違反法律嘅淫褻及不雅資訊，網上亦充斥好多未至於明顯違法，但同樣會對一啲心智未成熟嘅青少年產生不良影響嘅訊息，例如係有違我哋中國人嘅傳統倫理道德嘅內容。對於呢啲不違法、但不符傳統優良倫理道德嘅資訊，單靠自律係唔夠嘅，應對方法係好似原議案同修正案指出，要積極推動建設良好家庭、家教、家風嘅公眾教育及宣傳，向兒童及青少年灌輸正確嘅價值觀，包括家庭成員融洽相處、孝順父母、敬老護老、對子女嘅責任等等。
國家主席習近平講過：「不論時代發生多大變化，不論生活格局發生多大變化，我們都要重視家庭建設，注重家庭、注重家教、注重家風。」中華民族係一個着重家庭嘅民族，但香港嘅政府同社會，不論係回歸前後，都係多談個人自由，少講家庭、家教、家風；教育制度偏重硬知識嘅傳授，老師同家長缺乏良好溝通協作，每每只重着學業成績；結果導致青年人嘅家國觀念淡薄，引申種種社會問題。
我期望今屆政府會有唔同嘅態度同做法，切實加強香港嘅倫理道德及家庭教育。全港嘅學校、教師，仲有家長，每人多走幾步，以身作則，做好家教家風工作。本人謹此陳詞。