主席，首先感謝特首李家超先生，向本會發表2024年施政報告。我以「積極改革求變、構建美好前景」嚟形容呢份報告，喺發展經濟、推動產業、吸引人才、以及土地房屋方面，睇到今屆政府係有識變、應變、求變嘅決心，採納咗我哋G19議員嘅大量建議。
不過，正如我過去多次指出，空有政策同決心係唔夠嘅，仲要迅速、有效咁落實執行，讓市民切實感受到良政善治嘅成果。要達到呢個目標，關鍵之一係公務員嘅績效同處事心態，呢點亦係我一直非常關注嘅。
近年，雖然唔少公務員都已摒棄咗過時嘅「積極不干預」心態，明白政府要肩負「促進者」嘅角色，唔係只做監管者，唔能夠對私人市場同企業、產業嘅發展袖手旁觀。但有一啲公務員，對於市場嘅情況、實際嘅商業運作、企業嘅經營困難等，都似乎了解不足，亦唔主動去了解，導致唔少政策措施、要求嘅條款等，未能應對市場最新嘅情況，最終無法達到預計嘅目標。好似最近幾個月接連有發展項目流標，做唔到習主席強調嘅「將有為政府同高效市場更好結合」。
雖然公務員事務局近年已做咗唔少工作，加強香港公務員對國家、大灣區嘅認識，舉辦咗形形式式嘅考察團同培訓班等，但我感覺到部份部門同公務員仍然抱住舊思維，誤以為香港嘅所有產品、技術、標準同做法，都一定係最好嘅，未夠客觀、深入咁了解內地嘅產品同做法嘅優點，加以借鑒及善用。
呢種「大香港」心態再唔改變，就好難做到與大灣區內地城市嘅優勢互補同錯位發展，令香港錯失機遇。我明白有關情況涉及結構性問題，未必能夠喺短時間內改變，但希望特首同政府管理層予以正視，積極改革求變。主席，本人謹此陳詞。