主席，「狂人」特朗普再次當選上台，唔少人都擔心全球嘅政經金融會再起動盪。我早前已指出，以美國為首嘅西方社會近年對我國嘅無理打壓，其實主要原因係我國近年嘅高速、高質發展，某啲國家錯誤地認為會威脅佢哋嘅地位，繼而加以打壓、敵視。因此，無論係邊一位當選總統，美國嘅對華政策都唔會有重大改變。
我國領導早就洞悉有關問題，先後提出「一帶一路」倡議、雙循環經濟發展、仲有「科技自立自強」同「新質生產力」等戰略，一方面堅持對外高水平開放，一方面加強對內高質量發展。國家亦一早為香港嘅未來發展指明方向，要識變、應變、求變，更好地發揮「一國兩制」嘅獨特優勢，繼續與歐美各國加大聯繫，但同時亦要加緊融入國家發展大局，加強與東盟、中東等「一帶一路」國家嘅經貿關係，開拓新機遇。
香港嘅傳統優勢產業，金融、貿易、航運，近年都面對唔少挑戰，急需進行改革同發掘新嘅增長點。施政報告就此提出咗多項建議，包括建立「國際黃金交易市場」、建設「大宗商品交易圈」、發展高增值海運服務業、成立工作組推動「低空經濟」發展等等。係近年多份施政報告中，對推動產業發展最為積極同豐富嘅，值得大家支持嘅。
喺拓展市場方面，好高興睇到，無論喺金融、貿易、旅遊、以至教育產業等，報告都將「一帶一路」列作重點市場，包括爭取與中東地區嘅大型主權基金合作，與多個「一帶一路」國家商討簽訂自由貿易及投資協定，針對新興市場擴展經貿辦事處網絡，率領工商界及專業界到「一帶一路」市場考察等等，並計劃籌辦「一帶一路跨專業論壇」，向有關國家推廣香港嘅專業服務。
主席，我代表嘅建測規園業界，好早就有參與東盟及中東地區嘅建設項目，但過往流於單打獨鬥，缺乏政府嘅支持，難以持續發展，擴大業務。未來希望喺特區政府牽引下，聯同「國家隊」一齊「走出去」，互補優勢，共同發展。 此外，香港亦需要培訓更多熟悉「一帶一路」國家語言、文化、制度同法規嘅各方面人才，以拓展同深化雙方合作，希望短期內見到政府喺呢方面有實質措施。本人謹此陳詞。