主席，本會上月通過由我提出嘅議員議案，促請政府積極開發同善用土地，推動香港嘅經濟同產業發展。當中提到嘅「片區開發」模式、彈性批撥產業用地等，基本上已獲今年施政報告採納。喺建地造地方面，報告內容亦符合我嘅一貫主張，唔應該因為一時嘅經濟同財政問題，而大幅減慢以至暫停開發土地。
房屋政策方面，採納咗我同業界意見嘅內容就更多，包括調整出租公屋同出售資助房屋嘅比例、改革居屋抽籤制度、加強打擊濫用公屋同收緊富戶政策等，目的係鼓勵更多有能力嘅市民，尤其係公屋租戶同青年人，通過自置居所達致向上流動，而唔係單單希望「上樓」，「躺平」長住公屋，依賴政府福利。
除咗增建資助房屋，我促請政府多考慮其他方法，協助市民置業安居。例如通過「寓租於供」、「漸進式按揭」，以至首置貸款擔保等方式，減輕青年家庭嘅首期及早期按揭嘅供款負擔。
過去多年，我都批評政府就「雙老化」、即係人口老化及樓宇老化問題應對不足，今年明顯有所加強。針對樓宇老化，採納我提出研究以跨區地積比轉移同「專用安置屋邨」、利用新開發區土地等方法，鼓勵私營發展商參與舊區重建，唔能夠單靠市建局。
今年嘅施政報告，亦係歷來講得最多、最重視物業管理服務嘅一份。專業、高質嘅物管服務，唔單止可以提升市民嘅生活質素同居住環境，亦可以延長建築物嘅壽命，減少安全事故。報告提出建立「中央物業管理平台」及引入數字科技，提升公營房屋嘅管理同服務；喺私樓方面，會引進小區「聯廈聯管」模式，為「三無大廈」提供基本物管服務。
我希望政府同社會各界，未來會更加重視、重用嘅專業物管公司及人員，加強推動物管服務智能化，協助業界提升形象同紓緩人手不足問題，推動香港物管業界與內地嘅同業交流合作，以至落實兩地嘅服務標準及資格互認等。本人謹此陳詞。