「檢視《長遠房屋策略》，縮短置業階梯」議案發言

主席，雖然近期私樓樓價已有所回落，但同唔少市民嘅負擔能力仍有一定距離。想買居屋等資助出售房屋，又僧多粥少，可能抽極都抽唔中。導致唔少基層市民，包括部分年輕人對「上車」係死心，改為將入住出租公屋，即係將「上樓」視作人生嘅最大目標。部分青年人因而刻意不求上進，寧願打散維生，以免喪失輪候公屋嘅資格。剛才林筱魯議員都講咗，有關現象極唔健康，影響社會向上流動，削弱咗香港嘅發展動能。

隨着政府加緊覓地建屋，土地及房屋供應有望逐步增加，所以我近兩年都促請政府，檢討現時過份側重出租公屋嘅房屋政策，達致原議案提出嘅「協助市民向上流動」，以及部分修正案提出嘅「鼓勵更多有能力嘅市民自置居所」。

具體點做呢？我喺修正案提出咗5點。第一係檢討公私營房屋嘅建屋比例，第二係檢討公營房屋當中嘅出租公屋與資助出售房屋嘅比例，以增加包括居屋、綠置居、首置盤、以至其他類型嘅資助出售單位嘅供應，協助更多買唔起私樓嘅市民自置居所，力爭上遊。

第三點係優化資助出售房屋嘅抽籤及分配機制。早喺4年前我就提出，係咪可以畀啲抽居屋、抽極都抽唔中嘅申請人，有較高嘅中籤機會，例如派多一個「冧把」畀佢哋，有唔少市民都好支持我呢個建議；亦有人提議直接增加分配畀單身申請人抽籤嘅單位數目。其實仲有好多方法嘅，例如有人建議好似排公屋咁，設立一個居屋輪候冊，等申請人，計得到、同睇得到佢哋「上車」嘅希望。

第四點係喺公營房屋引入「寓租於供」及「漸進式按揭」嘅概念，某程度即係租置計劃嘅進階版，畀一啲有上進潛力嘅青年人同年輕家庭，以低於市值、但又高於一般公屋租金嘅費用租住資助房屋，交租當供樓，但唔使畀首期，或只須畀好少嘅首期。開始時每月按揭供款可以少啲，到後期收入增加就供多啲，到最後擁有自己個單位嘅業權。如果中途想換樓或套現，可以將個單位按已支付樓價嘅比例賣番政府，當係政府幫佢哋儲錢。聽落好似好複雜，其實有發展商都推出過類似嘅計劃。

最後一點，係我12年前最初成為立法會議員時已提出嘅，制訂「人均居住面積」同「住屋開支比例」指標。依家公營房屋係有呢啲規定嘅，人均佔幾多呎，單位面積最細係幾多，租金或售價要同市民嘅負擔能力掛鉤，但私營房屋就完全冇相關指標。

政府現正就取締「劣質劏房」做諮詢，主要針對安全同衞生嘅問題，但人均居住面積都好重要。對於其他非劏房私樓家庭，政府亦應該有相關目標，讓大家都可以住大啲、住鬆啲、住好啲。之前供應短缺，以上幾點政府想做都冇辦法，依家開始有條件嘞，所以我希望政府真係認真考慮。本人謹此陳詞。