「積極開發及善用土地，推動經濟及產業發展」議案-主體發言

主席，《基本法》第7條規定，「香港特別行政區境內的土地和自然資源，屬於國家所有，由香港特別行政區政府負責管理、使用、開發、出租或批給個人、法人或團體使用或開發，其收入全歸香港特別行政區政府支配。」

作為產業測量師，我同好多負責土地政策嘅官員一樣，對相關條文相當熟悉。但我同唔少業界人士都認為，回歸廿多年來，政府喺履行條文賦予嘅權責方面，有唔少嘅提升空間。尤其喺善用土地，推動香港經濟同產業發展方面，過往嘅工作係差強人意。

先講土地開發，香港樓價早幾前失控飆升，中產買唔到樓，基層上唔到樓，可作創科及其他新興產業發展嘅土地嚴重不足，主要原因之一，就係政府並冇積極、持續同前瞻性咁規劃及推動提供所需土地。香港喺回歸後25來，以填海新增嘅發展用地，面積唔夠回歸前25年嘅十分之一，土地供應不足，造成種種住屋、交通及其他民生問題，亦局限咗經濟同產業發展。

近幾年香港經濟放緩，樓市回落，政府出現財赤，部分人認為應減慢造地，擱置填海。我同不少業界人士都未必認同，擔心會重蹈10多年前嘅複轍，到經濟重新起飛時又唔夠地用，影響香港嘅競爭力同發展空間。

對於財赤問題，好高興現屆政府採納意見，改變回歸後偏於單一嘅土地開發同基建推展模式，更好地善用私人市場嘅力量同多元嘅發展、融資方案，包括增發基建債券，推出不同嘅公私營合作計劃。剛於上周發表嘅《2024年施政報告》，提出會試行「片區開發」模式，喺推出土地及項目之前，預早探討市場情況及潛在參與者嘅意見，利用市場力量，加快北部都會區嘅建設，係非常值得支持。

唔少業界人士亦指出，喺回歸前，香港嘅批地模式係比較多元化，會考慮藉批地嚟協助不同企業及產業發展。但回歸後，尤其係出現數碼港爭議之後，政府嘅批地模式就變得單一，予人感覺只會通過公開拍賣同招標批地，價高者得，唔會諗下如何利用批地嚟推動產業發展，為香港經濟帶來持續嘅效益，只係僵化及被動咁應對市場同行業嘅需求。

面對近年物業市道欠佳，多幅政府及公營機構推出嘅土地發展項目相繼流標，我提議改革現行嘅單一批地模式，引入賣地「分成」制度，由政府與發展商共同分擔市場風險，以免因一時嘅經濟不景，而大幅減慢各類樓宇嘅中長期供應。同時，將來如果市況轉好，政府喺「分成」制度下可賺取更多收益，唔需要擔心畀人質疑係「賤賣土地」或「明益地產商」。

另外，政府嘅短期租約政策過去亦係相當僵化，租期短、選擇少、條款辣，令企業及投資者唔敢作出較大同長遠嘅投資，不利新興產業發展。對於需要大面積土地同大量資本投資嘅大型內地或跨國企業，喺香港搵地又難又貴，唔似部分鄰近國家或地區咁，會主動提供土地及稅務優惠等補貼，以吸引佢哋落戶。

我好高興見到，現屆政府正針對有關問題作出改革，包括今年施政報告提出，探討選取試點產業園區，按照敲定好嘅產業政策，制訂園區嘅發展及營運策略，以至日常管理同招商引資工作。政府亦會考慮因應個別產業嘅發展需要，以更具彈性嘅方式批撥產業用地。

除咗新土地嘅開發同批租，現有土地嘅使用同管理亦同樣重要。香港嘅土地規劃，喺圖紙上睇落往往相當美好，交通及社區配套齊全，但往往只係紙上談兵，缺乏落實執行嘅機制同時間表。好多所謂嘅綠化空間，長期雜草叢生，或者早已被人填平，作為一啲低產值同有損環境嘅用途。當中唔少更係涉及霸佔官地同違法僭建，但政府疏於執法，形成「習非成是」嘅情況。

當原定嘅土地規劃遲遲未能落實，但市場卻不斷變化，部分業主同企業想改變土地或物業嘅原有用途，相關嘅改劃、改契同補價程序繁複，需時經年，窒礙咗企業落戶同產業嘅發展。

主席，部分部門同官員充斥咗「佛系」思維，某程度係源自回歸前港英政府嘅「積極不干預」政策，將經濟同產業發展，包括相關嘅土地開發、管理同出售、出租，以及樓宇嘅供應數量同時間，好大程度依賴係自由市場去落實。但事實證明政府完全放任不管，欠缺積極主動，就會喪失利用土地嚟推動經濟及產業發展嘅主導權。

習近平主席兩年前訪港時發表嘅「七一講話」，指示香港要轉變治理理念，把有為政府同高效市場更好結合；強調香港要不斷增強發展動能，積極穩妥推進改革，破除利益固化藩籬，充分釋放社會蘊藏嘅巨大創造力和發展活動。今年嘅二十屆三中全會，亦係強調要「進一步、全面、深化改革」。

李家超特首發表嘅新一份施政報告，畀我哋見到政府有貫徹始三中全會精神，以及落實習主席講話嘅決心。尤其喺土地及產業政策方面，遠比過去更為積極進取、多元靈活。餘下嘅問題在於執行，如何令各級公務員，包括負責土地管理同發展審批嘅前線人員，都變得「能做事、做成事」，「以結果為目標」，呢個係更大、更具挑戰性嘅改革課題，希望政府管治團隊繼續努力，做出成績，善用土地嚟推動香港經濟同產業嘅發展。本人謹此陳詞，懇請議員支持我嘅議案。