謝偉銓投訴官員答覆質素差

立法會內會噚日開會，擔任主席嘅民建聯李慧琼（Starry）話收到建測規園界謝偉銓（Tony）嘅信，關注官員出席立法會會議、提交討論文件嘅質素，佢已經向政務司長張建宗反映，司長話會跟進。

張建宗話會跟進

Tony 同Emily 講， 官員答覆同討論文件質素差嘅例子好多，例如勞福局早前向財委會申請向獎券基金注資11 億元，但文件太簡單，資料唔夠，認為政府官員唔應該預期個個議員都有參加事務委員會；佢又話，有時官員未必即時有資料回應，佢都明白，但可以直接講，唔好讀番文件唔關事嘅內容，嘥大家時間。

Tony畀Starry嘅信提到，政府申請直接注資模式嘅撥款項目唔使經工務小組審批，只需要喺所屬嘅事務委員會同財委會審議，有關討論文件往往太過簡單，缺乏基本嘅財務資料、工程內容或圖表，令議員好難有意義咁審議，例如落馬洲河套區創科園第一批次發展、香港郵政空運中心、獎券基金同數碼港擴建計劃等，講緊嘅錢都係數以十億計。

獎券基金注資嘅申請早前只以一票之微，僅僅喺財委會獲通過，包括Tony在內多位建制派投反對票。