議員故宮館開眼界 話文物多到睇唔晒

炎炎夏日,唔想同陽光玩遊戲,去室內參觀展覽實屬首選。立法會民政事務委員會部分成員,尋日聯同立法會主席梁君彥及其他議員30多人,聯袂參觀香港故宮文化博物館,儘管面積唔及得北京故宮、同台北故宮博物院咁大,但琳琅滿目嘅展品都令到一眾議員眼界大開,有人大呼唔夠喉,話用多幾日都睇唔晒!

雖然「當窗理雲鬢,對鏡貼花黃」係女士嘅專利,但一件名為「犀牛馱梳妝鏡」嘅18世紀鐘錶梳妝台,就令到選委界議員陸頌雄駐足良久,仔細端詳呢件展品嘅精緻工藝。據資料顯示,「犀牛馱梳妝鏡」可存放香水樽、剪刀、眉筆等化妝用具,至於圓鏡上面嘅機械鐘,似乎係提醒整理儀容嘅女士要留意時間,然而機件過咗咁耐仍能否如常運作,咁就不得而知喇。

犀牛馱梳妝鏡令陸頌雄駐足
陸頌雄其後喺社交平台貼文,指館內除咗有明清兩代嘅文物國寶外,遠至商代嘅器皿都有收藏,亦有外國文物展出,體現中西文化交流對話嘅特色。即使滿清喺1912年終結,但末代皇帝溥儀遜位之後仍然喺故宮居住咗十多年,期間仲購買留聲機同大量唱片欣賞京劇及梆子戲,而選委界議員管浩鳴就對一部民國時期嘅留聲機十分感興趣,更擺埋「甫士」拍照添。不過管浩鳴並無沉緬於歷史嘅情懷,反而希望政府調撥資源,令文化及創意產業界更多應用數碼科技,為青年開拓新機遇、釋放創意咁話。

議員陳學鋒就話館內雲集900多件國寶級文物,因時間關係,未有機會逐一欣賞。佢話假如每件展品欣賞20秒,整個行程都最少都要5個鐘!提醒有意參觀打卡嘅朋友記得要預留充足時間。而就算時間有限,議員李鎮強都落足眼力欣賞珍貴嘅展品,事後佢話眼界大開,笑言「要去多幾次才能看完」。

建築、測量、都市規劃及園境界議員謝偉銓,就已經係第3次到訪,佢話頭兩次到臨分別喺5月中同6月初,當時雖未有展品,但單係建築設計都好值得睇。而今次終於有得入內近距離欣賞大量珍貴展品,形容「唔好話兩個鐘,用兩日時間都睇唔晒」,仲話遲啲一定要再去第4次!

至於立法會主席梁君彥就係第二次參觀,形容為「遊古今歷無界」。佢話兩個多月前來視察,珍貴文物仍未運到,博物館仲係「清水樓」,而尋日就觀賞其中5個展廳嘅展品。