[:zh]隔牆有耳：立會宴請領事 建制夾實反送中代表[:]

[:zh]

立法會前日恆常宴請多國駐港總領事，可惜因為宴會全程閉門，傳媒無機會拍到議員席間如何同領事就近日熱議嘅送中條例交流。從立會事後上載嘅相片睇到，被部份與會人士形容表現「勤力」、不斷向領事就送中惡法「消毒」嘅建制派議員，都坐喺近日反「送中」扮演重要角色嘅領事旁邊，唔通真係咁啱得咁蹺？

民主派：座位抽籤係「天意」？

講過送中惡法一旦通過，或會影響美港雙邊協議嘅美國駐港領事唐偉康，分別被建制派林健鋒同謝偉銓夾住坐；日前向特首林鄭發出外交照會，表達對修例關注嘅歐盟駐香港及澳門辦事處主任卡諾（Carmen Cano），就坐喺民建聯主席李慧琼同陳凱欣中間。至於早前講修例一旦通過，或會取消同香港的移交逃犯協議的德國，佢哋位駐港總領事林文禮（Dieter Lamlé）就坐喺立法會副秘書長同另一名領事中間，坐正喺隔籬嘅都唔係民主派。

有民主派議員話，噚日座位係由秘書處抽籤安排，莫非真係「天意」令上述領事身邊都只有建制派議員？八方向立法會秘書處查詢，發言人話噚日嘅午宴座位按照一貫做法編排，駐港總領事及名譽領事係按香港特別行政區排名名單入座，而議員則以抽籤方式編配枱號後自行選擇座位，並由一位議員擔任主持人。

李八方

[:]