[:zh]《2020年撥款條例草案》三讀發言[:]

[:zh]主席，就《2020年撥款條例草案》嘅條文納入及三讀表決，我希望講解吓我嘅投票取向及背後考慮因素。正如我之前指出，為咗紓緩新冠肺炎疫情對各行各業及各階層市民嘅影響，財政司司長陳茂波喺今份預算案，推出咗總額高達1,200億元嘅紓困措施，並預計本年度會錄得接近1,400億元嘅財政赤字，兩者嘅金額都係歷來最龐大嘅。

但係大家都知道，隨着疫情迅速擴散至全球各地，歐洲、美國、日本等多個經濟大國，先後都出現大爆發，對香港經濟造成嘅打擊，肯定比2月發表嘅預算案時所作出嘅預測嚴重好多。喺上周公布嘅本港首季GDP，就按年大跌咗8.9%，為六十年代有紀錄以來最高。

陳茂波司長喺上月底回應議員嘅二讀發言時，亦宣布將今年全年嘅經濟增長預測，大幅調低至負4至負7 個百分點。因應有關新情況、新發展，政府其後再推出總額高達 1,375億元嘅第二輪「防疫抗疫基金」，包括破天荒資助私人企業向員工出糧、喺未來兩年增聘3萬個臨時職位等。

呢啲措施都係適時同有必要嘅，但係因應疫情好大可能難以喺短期內完全消除，或會導致政府多項主要收入減少，本年度嘅財政赤字好可能會比預期超出許多，因此，《2020年撥款條例草案》裡面嘅好收入同多開支預算建議，好可能經已變得唔準確。

不過，財政司司長估錯數，政府財政突然間由盈轉虧，或者轉虧為盈，由原本預算只得百多億元盈餘，到最後埋單計算時變咗千幾億盈餘都試過，未必全然係政府或司長嘅錯，議員唔應該因為咁樣而反對預算案三讀。

主席，攬炒派議員因為不滿警方執法，不滿個別警員、個別官員，或者個別部門嘅表現，就採取「逆我者亡」嘅手法，希望拖垮、否決成份財政預算案，逼使政府關門，停止向市民提供服務，懲罰唔跟從佢哋做法嘅公務員、警隊，令到佢哋冇糧出，呢種咁嘅態度同手段，我絕對不認同。佢哋好多時都針對警察，如果冇晒警察，有咩人會得益呢？一係犯罪嘅人，一係想自己話晒事，自己講嘅嘢就係法律嘅人。

我之前已指出，對於個別部門或者官員嘅工作同表現，我都係有不滿嘅。舉兩個例子，例如勞工及福利局，佢哋有責任保障同提升香港打工仔嘅勞工權益，但係喺佢哋眼中，香港好似只有基層勞工，「勞工」一詞係咪並唔包括中產階層及專業人士呢？又或者勞福局係認為，中產及專業僱員嘅勞工權益並唔需要受到保障，喺面對疫情同經濟逆境時佢哋係唔需要政府加以支援。喺呢方面我見到，勞福局已就「保就業計劃」有所調整，係從善如流嘅做法。

對於好多建設派議員都批評過嘅香港電台，我亦係好有意見。除咗《頭條新聞》、《左右紅藍綠》同世衞事件之外，其他唔少時事節目、新聞報道等，往往都畀人覺得係有既定立場同立論偏頗，甚至係有煽動市民仇警、仇視政府、仇視中國同仇視建設派之嫌。

不過，我唔會因為咁樣就一竹篙打一船人，因為有不滿，就要求削減港台嘅開支，甚至威嚇要「攬炒」否決成份預算案。我亦唔會因為不滿「保就業計劃」嘅部分執行細節，就要求勞福局局長羅致光先生全年都冇糧出。呢種態度、做法都係唔應該嘅。

主席，喺全民努力下，香港之前有連續超過三個星期，都冇出現源頭不明嘅本地確診個案，好可惜呢個紀錄係尋日打破咗。但其實對比起全球大部分國家同地區，動輒以有數以萬計嘅確診及死亡個案，香港嘅疫情總體算係相當輕微。

依家香港面對嘅最大威脅，對內係「黑暴」重臨，對外係美中關係再度惡化，即使疫情完全消失，香港經濟好可能仲有排難以好轉，社會民生喺一段時間內仍會持續動盪。希望政府同財政司司長會繼續審時度勢，因本港以至全球局勢嘅最新發展，善用納稅人多年來辛辛苦苦儲落嚟嘅儲備，適時、靈活咁調配資源，適切地推出更多紓解民困同重振經濟嘅措施。
[:]