[:zh]《2020年撥款條例草案》(2020至2021年度財政預算案)二讀發言[:]

[:zh]主席，香港先後受到中美貿易磨擦、連串社會運動及違法暴力事件，以及近期嘅2019新型冠狀病毒疫情三重打擊，經濟衰退，失業率上升，各行各業及各階層市民都深受影響。財政司司長喺今年2月發表嘅2020至2021年度財政預算案，推出總額達1,200億元嘅紓困措施，希望協助市民同企業渡過難關。

雖然事隔只有約兩個月，但疫情嘅擴散速度及所造成嘅影響，比不少人想像中都更快、更廣、更深，本港、內地，以及疫情嚴峻嘅歐美經濟大國，都先後實施咗嚴厲嘅防疫措施，導致大部分經濟活動停頓，減薪、裁員同公司倒閉潮不斷湧現，影響肯定比起98年亞洲金融風暴同08年金融海嘯嚴重，甚至可能超越上世紀30年代嘅全球經濟大簫條。

政府因此先後推出金額共達1,675嘅兩輪「防疫抗疫基金」紓困措施，為咗推行有關措施，加上近期「特別上班安排」同各類防疫限聚措施嘅影響，今年預算案內嘅各項收入同開支預算、各個部門嘅原訂政策推動、執行計劃等，都好難不受影響，估計會慢咗、遲咗。

我希望政府上下同心，喺疫情紓緩時加緊追回工作進度，司長亦要調撥資源，促進各部門善用科技，用更有智慧嘅方法推行各項新舊措施，維持、以至提升施政效率。

講到工作效率，本屆立法會任期只剩番不足半年，實際開會時間更不足3個月，我希望不同界別同黨派嘅議員，都能以市民福祉為依歸，適當地行使憲制權力，喺餘下任期為市民做多啲實事，減少不必要嘅政治爭拗，唔好再為反對而反對、為拉布而拉布。

主席，講番今日恢復二讀嘅《2020年撥款條例草案》，我喺2月底回應時，已批評預算案喺重振經濟方面「等運到」。香港疫情近日有所緩和，政府以至整個社會，都係時候認真諗下點樣喺疫情過後，重新啟動香港經濟嘅經濟齒輪。

要迅速恢復香港嘅經濟動力，首要係保住現有嘅企業、就業同人才，幫大家吊住條命，唔係等心跳、呼吸都停咗，先至做心肺復甦，希望起死回生。

喺限聚令實施前，我走訪咗上百間業界公司向佢哋派發口罩，親身了解業界喺疫情下面對嘅困境同訴求。佢哋好多都同我講，業界最想嘅唔係伸手向政府攞錢，而係希望有多啲工作做，等佢哋可自力更生，以及希望政府幫佢哋解決已迫在眉睫嘅資金鏈斷裂危機。

政府透過首輪抗疫基金及財政預算案，向合資格顧問公司發放2萬至5萬元嘅抗疫補助，對大部分業界嚟講只算「好過冇」。我隨後寫咗超過十封信同意見書，畀唔同嘅局長、司長同特首，並多次聯同建測規園界四個學會，與特首同發展局等多個部門嘅官員會面。

政府其後推出抗疫基金2.0，回應咗我同業界提出嘅不少訴求，包括動用逾800億元推行「保就業計劃」，破天荒補貼私人企業向員工出糧，提高中小企貸款金額及放寬借貸條件等。政府亦會要求各個政策局與部門，就建築工程及顧問合約加快及加密付款，紓緩業界嘅現金流壓力。

正如我喺財委會指出，上述措施仍有唔少不足之處，部分執行細節更似乎相當「離地」。例如建造業界公司因某項工程或顧問項目完咗，相關合約員工因約滿而自然流失，或者有員工畀人挖角，包括政府，導致公司嘅員工人數減少，係咪都會視作等同裁員而不合資格申請薪金補貼，甚或會被罰款呢？我希望局長可考慮。

計劃對於自僱人員同自由工作者嘅幫助似乎好少，年過65歲嘅員工更完全不獲補貼，變相鼓勵企業率先裁減資深僱員。

抗疫支援「宜快不宜慢」，我冇因為不完全滿意其中一兩項計劃，就反對整項撥款，但我好希望政府會以「宜寬不宜緊」嘅大原則，優化計劃嘅執行細節，照顧到建測規園界等專業服務業嘅特性，同時做到「保就業」、「保專業」。司長都係會計界出身，局長(黃錦星)更係建築界出身，應該好明白我哋專業界嘅運作同訴求，希望你會喺財政資源上配合。

喺增加工作機會方面，我提倡以「快、細、多」原則，加推建築工程及顧問項目。「快」就係要盡快、加快，等疫情完晒先推出就冇用；「細」係要盡量將合約拆細，切忌綑綁式招標，做到同一個餅，分到畀多啲人食，咁樣先幫到啲最受疫情影響嘅中小企；「多」就係要加多，例如依家已做緊嘅翻新公廁計劃、改造公共遊樂空間、延長及美化海濱長廊等，可唔可以即刻加碼做多啲。

我過去亦多次向司長反映，政府要進一步改革公共採購及招標制度。除咗減低「價低者得」比重，仲要避免畀少數跨國大企業壟斷，應引入某程度嘅「本地優先」元素，扶助本地專業及中小企發展。

最近有智庫組織做咗項研究，指出唔少海外地區，都已實行專門扶助本地中小企嘅公共採購政策。其中英國規定最少三分一嘅公共採購要畀到中小企，南韓就仲高，要求有五成要惠及中小企。點解外國可以咁做，香港又唔做呢？我建議政府規定最少有三成嘅建築工程及顧問合約開支，要畀到本地中小企參與投標。

主席，我早喺預算案諮詢時，已建議政府提供公帑補貼，將全港公共交通收費全面減半，藉此鼓勵市民消費同重新吸引旅客。司長喺預算案冇採納到，但係喺抗疫基金2.0就補做番，可惜減幅同覆蓋面都同我嘅建議差好遠。政府建議由7月起將港鐵車費減價兩成，可能會谷晒啲乘客搭港鐵，影響其他交通服務同整體運輸效率，點解唔資助埋其他公共交通呢？

預算案建議寬免薪俸稅、利得稅同個人入息課稅，但每人上限只得2萬元，反映唔到社會事件同疫情嘅影響，好多中產及專業人士覺得政府再次遺忘咗佢哋。我建議係大幅加碼至寬免8萬元，希望司長再諗諗。

政府除咗透過派錢、退稅同減車費嚟刺激經濟，另一大方向係加大公共開支，唔好因為預計政府未來幾年收入減少，出現財赤，就減少喺城市發展同基礎建設方面嘅投資。

香港近年經常講「智慧城市」、「宜居城市」，經過今次疫情同之前嘅社會事件，社會同業界都多咗好多人支持，要將香港建設成為一個更健康、更安全嘅城市。

早喺2月初青衣長康邨爆發連環確診個案，我聯同業界專家落現場講解渠管播毒問題，當時我已要求政府協助市民檢驗渠管。其後我進一步提議推行「樓宇防疫體檢」計劃，資助市民、學校、安老及殘疾院舍等，檢驗同維修建築物嘅渠管及通風設施，減少傳播疾病機會。

政府建議透過加開臨時職位，巡查約2萬幢私樓嘅牆身排水管，但只做檢驗，唔包維修。我希望司長可再走多步，例如透過現有嘅「樓宇更新大行動」提供防疫維修資助，等市民住得安心，家長可以放心畀小朋友復課，同時創造更多就業機會。

安全城市方面，我喺疫情爆發前已提議政府增撥資源，加快修復之前因社會事件而被破壞及塗鴉嘅公共設施，包括欄杆、地磚、路面、路牌、各類型嘅燈柱等，並可趁機會加以美化、重新設計，令相關設施變得更安全、耐用、美觀同有特色。

依家路面嘅人同車都少咗，正係進行有關工程嘅最好時機。抗疫基金2.0提出「公路結構美化工程」，我希望司長會預留足夠撥款，等有關工作可以做快啲、多啲，同時揀某啲項目舉行公開設計比賽，畀年輕專業人士發揮創意，令到香港喺疫情過後，整個城市可以新嘅氣象。

另外，我希望司長亦會認同，香港應該將呢次疫情轉危為機，優化整個香港嘅城市規劃，包括提高人均居住面積、提高醫療衞生設施嘅規劃標準、增加綠化同公共空間、提升空氣質素及通風採光等要求、鼓勵與建築相關嘅科技研發、檢討已過時法例同指引等等，將為香港建設成為一個更健康、更安全、同更具備智慧嘅城市。

主席，最後，我想引述「歌神」許冠傑嘅名曲，《同舟共濟》嘅歌詞：「既決意留在這條船，齊齊令它不遭破損，困境挑戰，奮勇地面對，令到這條船，永不翻轉…香港是我家」。

本人僅陳詞，支持《2020年撥款條例草案》二讀。[:]