[:zh]《2020年撥款條例草案》(2020/21年度財政預算案)全體委員會階段發言[:]

[:zh]主席，我喺二讀發言時，引用咗「歌神」許冠傑嘅名曲、《同舟共濟》嘅歌詞。事有湊巧，之後我參與咗發展局聯同建造業界，包括建測規園界四個學會嘅會長，大合唱為香港抗疫打氣，歌名咁啱亦叫做《抗疫同舟》。

不過，睇番攬炒派議員就預算案提出嘅修正案內容，好明顯，佢哋唔單止唔想喺肺炎疫情同經濟逆境下同心抗疫、同舟共濟，佢哋一心只係想攬炒、想鑿穿香港呢條船，令到大家一齊沉落海。對於反對佢哋攬炒、唔肯配合佢哋嘅公務員同部門，攬炒派嘅做法就係「逆我者亡」，要對方冇糧出、冇裝備用，甚至要刪除晒整個部門嘅開支，逼使對方停止運作，停止向市民提供服務。

攬炒派今年就預算案合共提出咗156項修正案，主席你最終批准咗其中52項。一如所料，今年有唔少修正案都係針對警隊，包括削減警方嘅線人費、證人費，用作購買武器、防護裝備、車輛同水警輪嘅開支，以至刪除整個警務處全年嘅運作開支，理由相信係不滿警方喺修例風波中嘅執法同表現。

主席，我另一個身份係監警會副主席，處理過唔少警員涉嫌違規、違法嘅投訴個案，但係唔係因為有個別警員作出不當行為，或者涉及僭建問題，就唔畀成個警隊用線人查案、唔畀警方購買任何執法裝備同器材，以至唔畀全港約三萬名警員返工同有糧出呢？係咪應該咁做呢？

立法會保安事務委員會尋日啱啱討論完2019年香港嘅整體治安狀況，原本去年上半年嘅罪案數字，創下咗自1977年有紀錄以來，亦即係42年來嘅新低，但受到去年中開始出現嘅「黑色暴力」影響，最後全年嘅罪案數字倒升咗9%，破案率亦顯著下降。

當中有部分罪案，包括嚴重毒品、三合會罪行、家庭暴力、虐兒、虐老等，數字就明顯回落，但警方亦承認，其實香港唔係少咗人吸毒、少咗黑幫活動，或者少咗虐打自己屋企人，而係因為警方忙於應對「黑暴」，人手唔夠，減少咗喺街上巡邏，上述同修例風波無關嘅罪案數字先至會少咗。

如果各項針對警隊開支預算嘅修正案獲得通過，警署被迫關門，所有警員被迫集體放無薪假，甚至好似呢啲黑衣暴徒所講，要解散成隊警隊，香港會變成點樣呢？

到時香港嘅罪案數字一定可以再創歷史新低，點解咁講呢？因為根本冇人執法同做紀錄，市民想報案都報唔到。香港將會由全球最安全、犯罪率最低嘅城市之一，變成最暴力、最無法無天嘅城市，我唔知道呢個係咪攬炒派想見到嘅香港，但我肯定唔會係守法嘅香港市民心目中嘅想見到嘅香港。

攬炒派除咗針對警隊，亦針對立法會行政管理委員會同民政事務總署提出咗多項修正案，要求刪除立法會秘書長、立法會法律顧問、同十八區民政專員嘅全年薪酬開支，主因亦可能係有關公職人員，未有跟隨同配合攬炒派議員嘅偏激政治立場行事。

作為議員，我一向認為應該以是其是、非其非嘅態度嚟監察政府，對於一啲政府政策、措施、部門，以至個別官員嘅表現，我過去都有表達不滿。但第一，我唔會使用言語暴力，唔會鬧人「狗官」、「落地獄」、以至「死全家」。第二，我唔會好似攬派咁，用呢種「逆我者亡」嘅手段，去威逼或者報復唔認同佢哋啲歪理嘅人。

例如陳志全議員分別對屋宇署、地政總署同政府產業署提出修正案，要求削減佢哋嘅部分開支，可能亦係不滿有關部門嘅工作。呢幾個部門我過往都有多次批評佢哋，包括地政署同屋宇署，對於霸佔官地同違法僭建嘅執法時間問題。不過，我唔會因而建議削減佢哋嘅開支，反而我會支持佢哋適切咁增加資源，使到部門有足夠人手同設施去執法，妥善及加快處理香港嘅霸地同僭建問題。

另一樣係要修例提高罰則及簡化執法程序，香港地價貴、租金高，業主違規霸地同僭建，所賺取收入往往係數以十萬計、甚至百萬計，但相關法例嘅最高罰則可能只係罰幾萬蚊，上到法庭更可能判罰幾千蚊就了事，毫無阻嚇性，部門點樣努力加強執法都變咗冇用。

對於其他多個有修正案嘅政策局同部門，我亦都係有意見嘅。首先係環境局，除咗監管油價不力，多年來嘅政策措施仍然係停留及集中喺減少污染，未能真正帶領市民活得更環保、更健康。依家仲喺立法會審議緊嘅垃圾徵費草案就係最佳例子，收費方案同配套措施都未能真正做到以人為本。

同樣做唔到以人為本嘅部門，仲有運輸署同路政署，喺交通規劃、基建設施同道路設計等方面，仲係以車為本、以路為本，影響到香港嘅整體城市規劃同市民生活質素。

對於律政司、教育局，以至政府新聞處喺修例風波嘅表現，我同唔少市民都係有不滿，包括律政司檢控工作緩慢，甚至因為出現錯漏而令到被告脫罪；教育局對於違法違紀嘅教師同偏頗失實嘅教材嘅處理；以及新聞處喺協助政府宣傳正面訊息、善用新媒體、打擊假新聞、假消息等工作，都有好多改善空間。

仲有係民政事務局有關西九文化區嘅工作，正如我之前喺立法會西九小組委員會所講，「等到眉毛都白晒」，都未見到西九文化區嘅主要文化設施落成，甚至連發展時間表都欠奉。不過，喺今次疫情中，民政局對於支援私人業主、物管公司、前線清潔工同保安員防疫抗疫方面，反應就相當快，迅速回應我同業界提出嘅訴求，表現值得一讚，希望新任嘅民政局長繼續努力。

主席，依家建設派議員喺立法會佔大多數，呢幾十項由攬炒派議員提出嘅「攬炒式」修正案，預計最終都會被否決。不過，一旦攬炒派取得過半數議席，手握立法會嘅控制權、否決權同傳召權，到時，就可能只有迎合佢哋嘅心意同無理要求嘅部門，先至可以有糧出、有人工加。到時，可能所有支持警隊依法執法、支持香港繁榮穩定、支持國家同特區發展嘅市民，都得唔到應有嘅權利同服務。主席，我真係希望呢一日永遠都唔會來臨。

主席，本人僅此陳詞，反對各項議員嘅修正案。

[:]