[:zh]《2021年完善選舉制度(綜合修訂)條例草案》全委會階段第四次發言[:]

[:zh]主席，以下係我嘅第四次發言，會集中講幾項涉及草案修訂嘅選舉實務安排，以確保未來三場重要選舉可以順利舉行。

人大311決定第7條規定，香港特區須修改本地法律，依法組織及規管相關選舉活動。人大常委會對《基本法》附件一二作出嘅修訂，進一步要求特區採取措施，依法規管操縱、破壞選舉嘅行為。政府因此透過今次草案修訂《選舉(舞弊及非法行為)條例》，將「藉公開活動煽惑他人不投票或投無效票」，即係呼籲選民投白票同投廢票，以及「故意妨礙或阻止他人在選舉中投票」，列為新嘅刑事罪行。

過去幾年，攬炒派對於一啲佢哋有機會勝出嘅選舉，會透過炮製假新聞，抹黑對手同政府，以至舉辦違法違憲嘅初選活動等，企圖操控選舉；對於一啲佢哋冇乜勝算嘅，例如特首選舉、立法會同選委會嘅部分界別選舉，佢哋就會公開呼籲選民投白票、投廢票，意圖擾亂、貶損有關選舉。

更離譜嘅係，喺前年嘅區議會選舉，有攬炒派喺網上教唆、煽動啲後生仔，偷走或收起家中長者嘅身份證，以阻止佢哋投票畀啲愛國愛港嘅候選人。亦有啲黑暴青年，喺票站外不斷重複排隊，目的喺阻撓嗰啲趕住開工搵食，或者難以長時間站立、曝曬嘅年長人士投票。

因此，草案除咗將妨礙他人投票訂為罪行，亦透過修訂《選舉管理委員會條例》轄下嘅多項規例，授權票站主任可為有需要選民設立特別隊伍，即俗稱嘅「關愛隊」，以方便一啲年長同行動不便嘅選民，可以喺合理時間內投到票，避免再被人用一啲下三流嘅手法阻撓。

對於上述建議我都係支持嘅，但感到政府實在做得太慢、太遲、同太少。喺好多國家同地區實施多年、行之有效嘅制度，例如郵寄投票、境外投票、電子投票同電子點票等，香港講咗十幾年都仲係研究、諮詢、再研究。選民去到票站領取選票、核對身份，仲係用緊成疊打印紙，要攞把間尺去刪劃，效率低，亦導致有唔少空間畀人做手腳。

草案建議修訂《選管會條例》轄下嘅附屬法例，引入電子選民登記冊，早10年就應該做喇，而且應用範圍應該廣啲，但遲到好過冇到。希望政府未來會加緊推動，將整個選舉流程電子化、現化代，減少人為出錯，減少被人干擾、操控同濫用嘅機會。

最後係有關因應今次修例，而展開嘅特別選民登記工作。涉及嘅改動好多，時間真係好趕，7月5日就要截止，9月中就要投票，就算聽日即刻做，都只剩番5個禮拜。好多市民，包括一啲界別嘅團體選民、當然選委，都對新嘅選舉制度唔太熟悉，好想快啲知道自己需否重新登記、幾時登記、點樣登記等等。

希望政府已準備好相關解說材料，草案一通過，就立即放上網、出廣告、發畀市民、議員同政黨，加強宣傳。大家目標一致，辦好三場選舉。主席，本人僅此陳詞，支持草案各項條文同修正案。[:]