[:zh]《2021年收入(汽車首次登記稅及牌照費)條例草案》二讀發言[:]

[:zh]主席，我發言係支持通過《2021年收入(汽車首次登記稅及牌照費)條例草案》，落實本年度財政預算案建議，由今年2月24日起將私家車首次登記稅及車輛牌照費，分別提高15%及30%，翻看紀錄，上次增加私家車首次登記稅已經係10年前，即2011年嘅事，而上次調整牌費，更加係30年前嘅事，即在1991年，所以今次作出檢討和調整，時間上係非常合理嘅。

香港經濟接連受到黑暴及疫情嚴重打擊，為了協助受疫情影響的行業、市民，政府係2020至21年度推出各項防疫抗疫措施，舒解民困，緩解行業嘅經濟壓力，以致去年政府財政赤字超過2,300億，因此我向財政司司長提交今年度嘅預算案建議書，亦有提議調高私家車，尤其係貴價私家車嘅首次登記稅，希望以「能者多付」嘅原則，喺財赤下開源節流，增加庫房收入。

除左增加稅收，相關條例亦可以透過加稅、加牌費作為財政手段，冷卻私家車近年既增幅。過去10年，香港車輛數目增加約32%，達到超過80萬部，新增嘅近20萬部車當中，有8成、即係約16萬部係私家車，而可使用道路只係增加左約3.7%，泊車位與車輛數目比例下降至1.02，創十年新低，道路同泊車位嘅增長遠遠追唔上汽車嘅增加既速度，造成道路交通擠塞、違法泊車隨處可見嘅問題。

香港地少人多，路面空間有限，而眾所周知，私家車嘅載客率比公共汽車係低好多，同樣嘅出行人數，如果使用私家車嘅人多，又點會唔塞車呢？所以減低私家車增長係有助紓緩日益嚴重嘅塞車問題，減少廢氣排放，改善路邊空氣質素，減少香港嘅整體碳排放量。

對於有意見指因應現時經濟情況，不應該加稅，建議暫緩一年先執行，但如果咁做可能會變相誘使市民加快喺稅率調升之前買車，造成促銷效應，令汽車增長不跌反升，亦有違政府加稅一般都即時實施嘅做法，同冷卻汽車增長嘅原意背背道而馳。

另外，有建議容許宣布加稅前已付運來港嘅私家車，可沿用舊稅率徵稅，我認為咁做係有違公平原則，因為唔同車行訂購新車嘅時間、數目、類型嘅安排都唔同，有關建議會令預先訂左大量車嘅車行有利，造成不公。

其實今次調高汽車首次登記稅，對50萬或以上嘅貴價車輛影響較大，因為首次登記稅係採用累進稅率去計算，即係售價越高嘅車，要俾既稅就越多，體現「能者多付」原則。而且大家唔好忽略，政府宜家嘅政策係鼓勵市民轉用電動車，因此不論係用燃油車輛「一換一」定係全新購入電動車，電動車首次登記同牌費都係比一般燃油車輛低。今次加稅同加牌費雖然係包埋電動車，但由於基數較低，對電動車嘅影響亦相對較細，例如淨重唔超過1公噸嘅電動車，牌費每年只係572蚊，首次登記稅及牌費上調後，對改用電動車相對更有利。

有意見認為，草案對限制車輛增長成效不會很大，我某程度上係同意嘅。香港嘅交通擠塞問題越嚟越嚴重，不能夠單靠增加私家車首次登記稅同牌費就解決到。政府喺2014年發表《香港道路交通擠塞研究報告》，提出多項短、中、長期措施，但淨係電子道路收費計劃，拖拖拉拉幾年，中環先導計劃至今尚未進行。要解決塞車問題，不能單靠提高徵費，應該要多管齊下去做，須提升公共交通的質素，減少市民使用私家車，鼓勵市民多使用公共交通工具，令大家感受到政府成日掛在口邊嘅「智慧出行」的好處。

主席，我睇到政府係有心解決塞車問題嘅，但係就欠缺全面嘅規劃。我之前問政府有關本港泊車位短缺嘅數字，原來冇做過統計同推算。所以我一直敦促政府展開第四次整體運輸研究，就香港嘅公共集體運輸發展策略、道路使用情況，以至城市規劃和基建設計等，進行全面和深入的檢討，長遠解決塞車同交通問題。

本人僅此陳詞，支持草案。[:]