《2022年僱傭(修訂)條例草案》二讀發言

主席，我發言係支持《2022年僱傭(修訂)條例草案》二讀。喺第五波疫情期間，有唔少僱員因為自己嘅家人、同事，或者居住嘅大廈有人染疫，而被當局根據《預防及控制疾病條例》，勒令接受隔離檢疫或者圍封強檢，無法正常上班。但係由於佢哋本身未必受到感染，或者係喺隔離同圍封一段時間之後至證實確診，按照現行法例，相關缺勤日子並不視作法定病假日，亦不能取得相關嘅疾病津貼，更甚會被視為「曠工」。

有關情況導致唔少打工仔手停口停，收入大減。有少部分人更因而被僱主解僱，非常無辜。如果佢哋係為咗維持生計、保住飯碗，而偷偷咁返工，不但本身係違法，仲增加咗病毒喺社區傳播嘅風險。

今次立法就係針對有關問題，透過修訂《僱傭條例》，將因為政府嘅防疫規定，而導致僱員活動範圍受拘限，有關受拘限嘅日子將被視作法定病假日，相關僱員喺訂明情況之下可取得疾病津貼。如果僱主因為有關情況，而將員工解僱或更改其合約條款，將被視作「不具有正當嘅理由」，受影響僱員可依法向僱主申索。

此外，為咗鼓勵全民打針，令「疫苗通行證」計劃更有效執行，草案亦訂明，當僱主已明確並公平地提出要求，但僱員仍拒絕出示有效嘅接種疫苗證明，僱主就被視作「有正當嘅理由」去解僱相關員工。

主席，為咗保障僱員嘅應有權益，為咗進一步提高香港嘅疫苗接種率，建立更好嘅免疫屏障，從而爭取盡快恢復通關、促使經濟能全面復常、同保障市民嘅生命及健康，有關修例建議係有必要嘅。對於草案內一啲未夠清晰同完善嘅地方，當局亦從善如流，提出修訂，因此我係會支持。

不過，正如我喺取消強積金對沖法案辯論嘅時候指出，任何勞工福利都係有成本嘅，差別只係由僱主、消費者，定係由納稅人去承擔。但要任何一方去「孭晒」，不但係唔公道，令到要承擔嘅一方唔服氣，亦都往往係難以持續嘅。

正如草案委員會報告第20段指出，現時唔少物業管理服務合約，包括政府嘅外判合約，都對承辦商每日當值嘅清潔工、保安員，同其他物管人員嘅人數，作出咗嚴格嘅規定，一唔夠數就會被扣減服務費，將來再投標嘅時候更會被「記黑豬仔」。

正如大家都知道，喺第五波疫情期間，唔少清潔工同保安員都染疫或需要隔離，佢哋嘅僱主一方面要支付大大增加嘅病假開支，一方面要出高薪聘請臨時工去填補人數，提供服務，補唔夠人數仲要畀政府罰錢同埋扣分。

同樣情況喺我哋業界嘅「Body-shopping」顧問合約亦有出現，當疫情高峰時，有不少員工感染或要接受隔離，最少要請假14日，但根據合約，政府每個月最多只會支付1日嘅病假開支，其他日子就要顧問公司負責，而相關嘅工作要按照合約依時咁去做，令業界覺得不單止好唔公平，直情係無法子經營落去。

喺我同相關業界反映下，多個部門都答應酌情咁處理有關情況，唔會亂咁罰錢同扣分。其中發展局及其相關嘅多個部門，更有積極咁向我哋業界提供支援，對此我再次表示感謝。但我希望政府可以全面檢討同修訂有關嘅合約條款，喺政府、僱員同僱主嘅權益之間取得適當平衡，唔好只係傾斜某一方，例如過於保障政府、庫房收入、同勞工嘅利益等等。

主席，本人謹此陳詞，支持《2022年僱傭(修訂)條例草案》二讀。