《2022年職業安全及職業健康法例(雜項修訂)條例草案》二讀發言

主席，去年香港發生咗多宗引起社會關注嘅致命工業意外，包括冧天秤、冧吊船等等，都同建造業界有關。雖然整體意外數字未見顯著上升，但意外一宗都嫌多，尤其係涉及嚴重傷亡，唔單止肇事工人，對佢哋嘅家人都造成重大嘅傷害，亦會影響成個行業嘅形象，減低青年加入行業嘅意願。因此大家都有責任去致力減少工業意外，加強保障工人嘅工作安全同健康。

今日恢復二讀嘅《2022年職業安全及職業健康法例(雜項修訂)條例草案》，係希望通過調高多項有關職業安全同職業健康嘅罪行罰則，加強阻嚇力，藉此提高僱主同僱員對安全嘅關注，共同努力去減少發生意外嘅機會。另外，部分罰則已有十多、二十年冇檢討過，適度咁調整係合理嘅。但係政府最初建議將僱主一般責任嘅最高罰款額，大幅提高至5000萬元，並且同涉事企業嘅營業額掛勾，我同好多業界人士都有意見。

第一係覺得唔公道，法律面前，人人平等，法庭判罰理應係同罪行嘅嚴重性同被告嘅責任嘅輕重掛勾，唔應該因為某間公司嘅規模同業務大，就罰佢重啲。第二係有關修例建議畀人一個感覺，係以為判得重啲，罰得多啲，就可以提升工業安全。實情係預防意外發生，永遠都勝過喺事後處罰。人命係無價嘅，不論罰款或賠償額有幾高，都無法彌補逝去工人嘅生命，以及對死者家屬造成嘅傷害。

對於僱主一般責任同其他多項罪行嘅罰則，仲有檢控時限問題、法庭喺量刑時需要考慮嘅證據資料等等，政府喺聽咗業界意見同與法案委員會嘅討論後，大部分都經已從善如流，作出調整。呢部分我喺全體委員會審議修正案階段再講講，依家先講下幾項有助提升建造業嘅工業安全，比告人、罰錢更加有效嘅一啲建議。

首先係施工時間問題。今屆政府強調要「提速、提效、提量」覓地建屋，大原則我係支持嘅，但我亦好早就提出警告，不論係政府官員定係我哋議員同事，都要避免過份逼迫承建商同顧問公司壓縮施工同工作時間，以免有人為求加快完工達標，而不合理咁加班趕工，因而對建築設計同施工嘅安全考慮有所忽略。

事實上，香港部分發展及建設項目進度緩慢，問題一般唔係剩係施工期，而係在於政府嘅前期規劃、諮詢、招標、以至審批同驗收等程序。唔少項目嘅前期工作動輒需時多年，但施工期可能只須三四年。立法會現正審議另一條有關精簡發展法定程序嘅草案，就係針對有關問題。同時亦要精簡化各部門嘅行政審批流程，可以慳到嘅時間可能係以年計，而唔係不合理咁壓縮施工期，導致工程嘅質量同工業安全受到影響。

另外，政府嘅招標制度同條款，亦都會對工業安全造成一定影響。要做到施工安全，最好喺建築設計時已加入有關考慮，喺工人進場前已做好地盤嘅安全措施。但過往嘅招標制度偏重懲罰，忽略預防同鼓勵。承建商嘅安全紀錄較差，會被扣錢，甚至禁止投標，但做得好嘅未必有獎勵。喺「價低者得」嘅評分制度之下，入標者投放多啲資源喺安全建造同地盤安全措施，反而可能會中唔到標。

政府近年已作出調整，更加重視入標者嘅安全紀錄同預防措施，亦有設立基金推廣「智慧工地」，資助業界研發同應用與安全相關嘅創新科技同設施等，但我認為可以更加積極進取，尤其係喺私營建造項目方面。

要提升工業安全，工人嘅質同埋量都好重要。量方面依家大家都好清楚嘞，建造業界由前線地盤工人、中層嘅技術同監工人員，以至我哋建測規園同工程界嘅專業人員，人手都係嚴重不足同高齡化，但係工程量同工作量喺未來幾年估計都會不斷增加，唔好話無法做到提速提量，可能連工業安全都難以兼顧。

質方面除咗要想辦法吸引更多年輕人入行，亦要加強工人嘅安全意識同知識嘅培訓。仲有係加快落實「工人計分制」，以協助業界辨別優質同安全紀錄較佳嘅工友，再加以表揚重用，由下至上咁提升建造業嘅安全水平，而唔係出咗事先去告人、罰人。

講到工人老齡化同科技應用方面，唔知大家有冇睇到喺兩地掀起熱潮嘅國產科幻電影《流浪地球2》呢？戲中展示嘅好多特效同科技，其實唔係天馬行空嘅想像，或者經電腦合成嘅影像，唔少產品其實已經喺現實世界應用緊。喺剛過去嘅周六，我就邀請咗電影嘅兩大幕後技術團隊嚟到香港，同我哋業界及一批大學生舉辦交流會，分享相關科技喺建造業以至其他界別嘅應用。

例如由上海「傲鯊智能」公司研發嘅外骨骼機械人，我自己都試穿過，喺提升工業安全同職業健康方面有好大發展潛力，可以減少工人因工作造成嘅勞損，同時亦可提高工作效率。該公司亦去咗機場同消防處參觀，講解有關外骨骼機械人，喺協助地勤人員搬運大量行李、協助消防員跑幾十層樓梯去救火救人時，都可以起到顯著嘅作用。

其實有關外骨骼機械人，原本係設計作醫療復康用途嘅，早前受傷嘅MIRROR舞蹈員都係用緊類似產品重新學習步行。有關設備對於改善長者生活亦好有幫助，例如幫老人家增強上落樓梯嘅能力。亦可以用喺佢哋嘅照顧者、安老及殘疾院舍嘅照顧員身上，協助佢哋更有效、更容易咁處理好多日常工作，例如幫啲長者同殘疾人士轉身同轉床，所以都係局長你負責嘅範疇。

不過，不論係喺特區政府、香港嘅建造地盤、企業同院舍等，想應用呢啲新科技同產品，首要係解決認證問題。呢方面希望發展局、勞福局，仲有創科局、商經局等，可以主動跟進，積極協助，攜手提升香港嘅工業安全同職業健康。本人謹此陳詞，支持草案二讀。