《2023年區旗及區徽(修訂)條例草案》二讀發言

主席，2020年10月17日，全國人大常委會通過修正《中華人民共和國國旗法》及《中華人民共和國國徽法》，加強對作為國家象徵嘅國旗同國徽嘅正確使用同保護。特區政府其後亦提出修訂香港嘅《國旗及國徽條例》，令到特區對國旗同國徽嘅保護，與國家嘅最新法規同標準保持一致。

當年我參加咗有關法案委員會，並提出點解政府唔一併修訂《區旗及區徽條例》，以同時完善對區旗同區徽嘅保障同正確使用。須知《國旗及國徽條例》同《區旗及區徽條例》，其實係一對孖生兄弟，絕大部分條文、用字都係好相似。如果前者存在唔完善嘅地方，後者亦都會出現同樣嘅問題。冇理由只改一條，而唔改另一條。

好高興，政制及內地事務局曾國衞局長，當時喺會上答應我一定會做，並且會盡快去做，所以我當然會支持現時提交本會審議嘅《2023年區旗及區徽(修訂)條例草案》，亦代表整個G19表示支持草案嘅二讀同三讀。

正如我之前指出，《國旗及國徽條例》同《區旗及區徽條例》，基本上係一式一樣嘅，相關修訂建議亦係大同小異，目的係進一步維護區旗同區徽嘅尊嚴。具體建議包括，訂明特區政府、立法會及司法機構，必須喺網站首頁使用區徵圖案；設立收回及處置區旗同區徽嘅機制；規範懸掛區旗同區徽嘅方式、禮儀、同周邊嘅環境；明文禁止倒掛區旗及區徽；以及禁止將區旗及區徽用於商業廣告或註冊外觀設計等等，以上建議我都係支持嘅。

不過，我個人認為當中最重要嘅條文，係經草案新訂嘅第7A條。第7A條訂明，教育局局長須就區旗及區徽納入中小學教育發出指示。而對於幼稚園，局方表示區旗及區徽教育，現時經已納入幼稚園嘅課程之內。

主席，我經常強調，不論係提升工業安全，定係推動環保減廢，做好公眾教育工作，永遠係比告人、罰人有效。《國旗及國徽條例》同《區旗及區徽條例》嘅主要立法目的，唔係為咗罰人，而係要令市民真心、真誠地愛國愛港，自動、自覺咁維護國旗、國徽，以及區旗、區徽等國家同特區嘅象徵。

有關區旗及區徽嘅教育，唔應該只針對中小學及幼稚園學生，對大專生、成年人、老友記，全港七百萬市民都要做好。有關工作唔止政府要做，我哋作為立法會議員、社會各界，都有責任去推動，同心攜手，並持之以恆，提升港人嘅愛國愛港情懷。本人謹此陳詞。