《2023年撥款條例草案》(2023-24年度財政預算案)二讀發言

主席，正如我喺預算案發表當日指出，今份預算案係唔易做。經歷咗3年疫情打擊，唔少市民同企業喺復常初期仍然面對種種困難，希望得到政府支援，但庫房去年錄得近1400億元赤字，加埋之前兩年，財政儲備唔見咗近4000億，跌至相當於12個月政府開支嘅較低水平，引起唔少人關注。因此，對於財政司司長喺今年預算案，提出穩中求進、中間偏穩嘅理財原則，一方面適度紓困，一方面開源節流，同時繼續投資未來嘅方向，係值得支持。

喺紓困同開源方面，預算案建議向市民發放5000元電子消費券，繼續提供薪俸稅、利得稅、差餉、電費、及交通費等寬免同補貼。預算案亦採納咗我提出嘅提高子女免稅額同增加煙草稅建議，後者除咗可增加稅收，亦有利市民健康同減少長遠醫療開支。

喺投資未來方面，預算案提出嘅賣地同房屋供應數字都係近年新高，而且公私營房屋並重，有助紓緩過去房屋供應「頭輕尾重」、「重公輕私」嘅問題。

對於唔少人擔心，嚟緊嘅「北部都會區」發展、「中部水域人工島」，仲有「三鐵三路」同大量公營房屋項目，會否拖垮特區財政。預算案提出設立「基礎建設債券計劃」同增發「綠色債券」，可紓緩庫房嘅現金流壓力，有助政府唔會因為短期嘅財赤，而減少投資未來，拖慢香港發展，影響政府為市民解決房屋、交通，以至貧富懸殊等問題嘅速度同成效。

就節流問題，喺審議臨時撥款議案時我已指出，1997年回歸前嘅政府開支，1年大約2000億元，到22/23年度嘅修訂預算，就增至8096億元，即係回歸前嘅4倍，增幅係相當、相當之驚人嘅。

政府整體開支喺回歸後急速上升，主因之一係社福、醫療同教育等開支大增。呢啲開支大多係經常性嘅，年年都要使，而且隨着人口老齡化，將會愈使愈多。單睇社會福利，23/24年度嘅經常開支係1210億元，佔整體政府開支超過兩成，係所有政策組別中最高，相對22/23年度升咗14%。按照呢個升幅，主席大約5年時間就會翻一翻。

除咗社福、醫療、同教育三大最高使費開支外，政府提供嘅房屋福利，主要包括興建同管理公營出租房屋方面嘅開支，近年亦大幅上升，不過就計咗落房委會帳目，冇喺政府開支帳目充分反映。仲有近年推出嘅各種公共交通費補貼，加加埋埋，納稅人喺提供各種福利、協助有需要市民方面，係使咗好多、好多錢。

習主席強調特區要「切實解決民生憂難」，我唔係質疑呢啲錢唔應該使，關鍵係是否用得其所，達到成效。唔少市民都睇到，有啲福利開支同政策措施好大可能遭到濫用，例如出租公屋，最近申訴專員都話要調查。亦有啲措施係重複、過時、效率偏低，以至喺社會產生某啲不良效果，未能有效鼓勵更多受支援嘅市民能夠自力更生，力求上進，甚至係變成「養懶人」。

今屆政府提出「精準扶貧」，確保各項扶貧政策同開支，真正幫到有需要嘅市民，以及協助佢哋脫貧，而唔係愈扶愈貧，或者好易被人濫用，相信好多納稅人都支持。希望政府可以全面檢視現行嘅各項福利開支，唔單止勞福局同社署，其他局同部門嘅相關政策及開支都要檢討，加以整合，提升績效，減少不必要嘅浪費，加強針對性同財務可持續性。

政府開支膨脹，另一主因係公務員編制與薪酬開支增長。港澳辦夏寶龍主任早前訪港，提到香港18萬公務員嘅績效，其實編制現已增至19.7萬。加上唔少由公帑資助嘅公營及法定機構，整體開支係相當之高。

為咗應對財赤，政府已連續兩年實施公務員編制零增長，但係我哋好多議員都覺得政府仲係不斷咁加人同開位。每項開位建議都似乎好有需要，用於制訂新嘅政策、提供新嘅服務、推展新嘅計劃，但好少聽到政府會檢視現行編制，點解善用現有人手處理新增工作，以及主動刪減一啲重複、過時、同低成效嘅職務同職位。

全國人大會議早前宣布，各個中央國家機關部門統一精減5%嘅人員編制，以騰出人手加強重點領域同重要工作。有內地媒體發表題為《精兵簡政，不養閒人》嘅評論，強調政府機構人員編制並非愈多愈好，如果部門人員冗餘、機構臃腫，就可能發生多頭管理同「三不管」問題，人員權責出現重疊不清同缺失，長此下去，會阻礙國家治理體系同治理能力現代化嘅進程。

主席，我無意要求特區各個局同部門，劃一精減5%嘅編制，但係需要全面檢視政府嘅編制人手，加以精減，重新調配，用以加強重點、重要嘅工作，而唔係一有新工作就加人開位。有關優化檢討工作，無論喺財政上，定係管治績效上，都係好有需要同有迫切性。

當然，除咗控制公務員編制人數，更重要係提升整體政府嘅績效同公務員嘅積極性，有必要要從公務員嘅評核、晉升同賞罰制度進行改革，確保公帑用得其所，以結果為目標，使到各階層市民都享受到施政嘅成果。

主席，最後我想講下考察完大灣區內地城市嘅感受。要落實「七一講話」要求嘅「結合有為政府與高效市場」，政府有必要檢視現行嘅投標制度。