《2023年稅務(修訂)(子女免稅額及稅務寬免)條例草案》二讀發言

主席，本人發言係支持《2023年稅務(修訂)(子女免稅額及稅務寬免)條例草案》嘅二讀。草案正如多位議員講咗，主要係落實財政司司長喺2023至24年度財政預算案，提出嘅其中兩項稅務建議。包括由2023至2024課稅年度開始，將子女免稅額由每個可扣減12萬元，提高至13萬元；以及為2022至23課稅年度嘅薪俸稅、利得稅、同個人入息課稅，提供每宗個案最多6千元嘅一次性扣減。

首先講子女免稅額，香港嘅生育率近年不斷下跌，幾乎係全球最低，加劇人口老齡化同勞動力短缺。有啲人歸咎係政治原因，話因為香港冇佢哋所謂嘅民主，令青年人唔想結婚生仔，但其實喺好多佢哋認為係民主嘅國家同地區，好似日本，同部分歐洲國家新一代青年人，都係唔想生、唔想結婚，「少子化」嘅問題愈嚟愈嚴重，所以係同政治無關，而係由於一系列經濟、社會，以至文化、心理等因素。

當然，其中一個香港年青人唔願生嘅原因，會係財政上嘅考慮。喺香港要養育一個細路仔，除咗最基本嘅醫食住行，教育開支亦相當高昂，包括補習、學琴、學游水、各類興趣班、遊學團等等，使費非常多。風之后李麗珊多年前已經話要400萬，相信依家肯定唔止。同時，唔少人都希望，如果生得個細路出嚟，就應該畀最好嘅嘢佢哋，於是思前想後，諗過度過，最後都係決定唔生，或者只生一個就「封肚」。

所以，我喺最近幾年嘅預算案建議書，都有要求港府效法某啲海外地區，推出一啲比較大刀闊斧嘅稅務同財政措施，嚟鼓勵香港人生兒育女。唔剩止係提高子女免稅額咁簡單，有啲地方直情係透過送錢、送車、送樓嚟鼓勵國民生育。今次預算案建議將子女免稅額輕微調高1萬元，可能只係僅僅追得番過去幾年嘅通脹，對生育率嘅刺激作用估計唔大。

我建議係大幅調高子女免稅額，例如增加1倍。而且可以改為累進式，生得愈多，就扣得愈多。喺BB仔出世嘅頭一年，唔止可以扣雙稅，扣多幾倍都建議考慮。我亦提議引入子女教育開支免稅額，以紓緩尤其係中產父母嘅稅務負擔。

我明白呢幾年政府面對嚴重財赤，喺提供任何稅務優惠同增加經常開支方面，都要特別審慎，但我覺得呢啲錢係好值得使嘅，係對香港未來嘅重要投資，希望政府認真考慮。

對於一次性嘅稅務扣減，同樣由於財赤，今年嘅扣減金額比過去幾年少咗，令到唔少市民同企業失望。我認同不論係退稅、派錢，定係派消費券，都唔應該變成恆常措施。隨着疫情過去，社會復常，政府嘅財政紀律都應該逐步復常，遵守番《基本法》規定嘅量入為出，審慎理財原則。

主席，我認為政府當前最需要做嘅，係迅速、有效咁推動香港經濟全面復甦，長遠、持續咁增長，使到各行各業同各階層嘅市民分享到經濟成果。本人謹此陳詞。