[:zh]「修補社會撕裂 凝聚民心」議案[:]

[:zh]主席，我發言係支持梁美芬議員提出嘅「修補社會撕裂 凝聚民心」議案。正如議案內容指出，2019年嘅反修例騷亂，令香港陷入嚴重政治撕裂，好多支持政府、支持警隊嘅人士，遭到杯葛、起底，甚至恐嚇、襲擊；有大批青年人被捕以至判監；有唔同政見嘅家人、朋友及同事反目成仇；政府有必要採取措施，修補撕裂，凝聚民心，重建香港昔日嘅多元、包容精神，團結一致謀發展、搞建設，否則香港嘅經濟同民生發展，就會不進則退，慢進也退。

唔少仇恨都始於誤會、敵對源於誤解。香港嘅社會撕裂有好多個成因，其中一個係不實同虛假訊息氾濫。香港市民過去對警隊嘅支持度係相當高嘅，但受到一連串針對警方嘅假新聞同假消息影響，包括冇爆眼嘅「爆眼女」、新屋嶺性侵案、七二一警黑勾結、八三一太子站打死人等等，令到唔少市民由撐警變成仇警，社會分裂、敵視，甚至互相攻擊。

更為嚴重同根深柢固嘅，係針對特區政府、中央政府，以至係對自己國家同民族嘅錯誤解說同抹黑。例如將本來用嚟處理台灣殺人案嘅逃犯修訂條例，說成侵害人權自由嘅「送中條例」；將便利兩地居民通關嘅「一地兩檢」安排，講成係「割地賣港」；將內地旅客以至新來港人士貶斥為「蝗蟲」；將國家對香港嘅關懷同支持，扭曲成對香港嘅干預、對「一國兩制」嘅破壞等等，令到唔少市民、尤其係年輕人變成反中、仇中，部分人更滋生咗違法違憲嘅港獨歪念。

主席，《港區國安法》成功為香港社會止暴制亂，完善選舉制度為特區政制撥亂反正。對於假新聞、假消息問題，特區政府亦已承諾會立法打擊，但要真正修補撕裂，凝聚民心，單靠立法係唔足夠嘅。最重要嘅係要即時、有效咁澄清闢謠，以正視聽。更加積極主動嘅做法，係搶喺假消息同假新聞出現之前，就可以準確、高效咁，向社會大眾傳遞各項政策、立法、以及有關香港同國家發展嘅正面訊息。

特區政府嘅澄清及闢謠工作，尤其係喺黑暴同疫情爆發初期，大家都公認係做得麻麻地。喺最近大半年，尤其換咗幾位問責官員，以及警方加緊打擊網上嘅煽惑及散播仇恨訊息之後，情況係有所改善嘅，但仍然有好大改進空間。喺宣傳政府政策、推廣正面訊息方面，特區政府就更加弱，相對於攬炒派嘅黑暴文宣，相對於美國等西方國家政府嘅語言偽術，完全係冇得比。

政府花咗四千幾萬委聘國際公關顧問，針對海外市場制訂宣傳策略，具體成效係點，大家有待觀察。但好多市民都會問，政府自己有政府新聞處、有香港電台、喺18區有民政事務處、喺海外有多個經貿辦事處，每花費數以十億元公帑，點解咁多年來都冇發揮成效，有冇好好善用呢？希望政務司司長認真諗吓，以實際行動同成效作回應。本人僅以陳詞。[:]