「充分發揮中資企業作用，促進香港融入國家發展大局」議案

主席，我發言係支持由嚴剛議員提出嘅「充分發揮中資企業作用，促進香港融入國家發展大局」議案，以及由另外兩名G19成員、譚岳衡議員同陳沛良議員提出嘅修正案。

香港向來係一個開放、自由嘅經濟體，歡迎來世界各地，包括內地嘅企業、商品、人才同資金進入香港。事實上，中資企業早喺回歸之前，已喺香港有着廣泛嘅業務。但基於一啲殖民時代遺留落嚟嘅過時制度同不合理嘅做法，加上一部分人嘅政治偏見，對國家最新發展缺乏深入認識，令中資企業喺香港嘅發展受到掣肘，亦妨礙咗香港融入國家發展大局嘅速度同深度。

以建造業為例，之前有一啲香港人對於由中資企業承辦嘅工程仍有一定疑慮，擔心係咪因為平，而忽視咗質量同設計，以至影響到安全水平，變成所謂嘅「豆腐渣工程」。

其實依家內地嘅建造技術同施工質量，喺好多方面都已超越外國。其中喺鐵路、橋樑同隧道等大型基建工程，更係全球首屈一指，唔單止造價平，工期短，喺創意創新，外觀美感，以至環保減碳方面，水平亦愈嚟愈高。

有人或會擔心，多咗中資企業嚟香港，會唔會影響本地企業同人才嘅發展，其實兩者係冇矛盾嘅。首先中資企業來到香港，大部分都會喺香港註冊成立公司，佢哋聘用嘅人大部分都係本港居民，例如做工程嘅，就一定要聘用本地建築團隊。我代表嘅建測規園界專業人士，亦有唔少係任職不同嘅中資企業，學習到佢哋嘅先進技術同喺內地營運嘅經驗，亦能協助有關企業熟習香港嘅法規同市場環境，做到與國際接軌，達致多贏局面。

要充分發揮中資企業嘅作用，政府有必要檢視有冇一啲過時同不合理嘅制度程序。例如喺招標同審批方面，對於一啲嶄新嘅技術、設計、以至建材等建議，唔好只睇係咪取得歐美國家認證，而無視我哋國家制訂嘅國標，以及喺內地進行嘅測試及應用經驗。喺資料數據嘅轉移同儲存，容許部分工序喺香港境外進行方面，亦應該適度放寬，以更好地利用中資企業嘅技術同產能優勢。

主席，隨着以美國為首嘅西方反華勢力，近年加緊打壓我哋國家，施加種種不合理嘅貿易、金融同科技制裁，香港亦難以獨善其身。喺呢個國際大環境之下，讓中資企業喺香港充分發揮作用，除咗可帶嚟經濟同民生嘅益處，喺戰略上亦係有其必要。

但係與此同時，我哋亦要加緊對外說好香港故事，強調香港係一個開放、自由嘅國際都會，歡迎不同背景嘅企業同人才來港發展。尤其係喺人民、文化、旅遊、體育、同學術交流方面，突破西方喺政治同經貿層面嘅打壓，對內做好高質量嘅發展，對外促進高水平嘅開放。本人謹此陳詞。