「制訂全面人口政策」議案

主席，感謝我哋G19嘅梁毓偉議員，提出今日嘅「制訂全面人口政策」議案。早喺上屆立法會，香港仲未爆發黑暴、疫情、同移民潮，當時有市民仲擔心緊香港會出現「人口爆炸」，要求削減單程證配額嘅時候，我已提出警告，隨着生育率屢創新低，香港嘅人口老化同勞動力不足問題將日漸惡化。我亦問過某位相當高層嘅政府官員，要求當局全面檢視人口政策，結果得悉特區政府過去根本唔存在一套完整嘅人口政策，因此亦談不上點樣優化同檢討。

其後黑爆同疫情爆發，加上近年內地同香港嘅經濟、生活水平不斷拉近，移居香港嘅吸引力不斷下降，另一方面又有部分人因種種理由離開香港，令香港連續兩年出現人口淨減少，多個行業同專業都出現人手短缺。我哋G19去年向特首提交名為《全面檢視及落實人口和人才政策》嘅意見書，提出咗13項具體建議。當中多項有關吸引人才嘅建議已獲得採納，但對於人口政策，政府似乎仍然未有正視同重視。

人口政策係好闊嘅，各類具體措施同做法，可能幾個鐘都講唔晒，所以喺剩低嘅幾分鐘，我會集中講4個主要嘅行動策略，供大家參考。

第一係要減少現有人口同人才流失。容海恩議員嘅修正案提到，香港要「對外搶人才，對內留人才」，我係非常認同嘅。香港除咗要致力挽留現有嘅專業人才，亦要加強培訓所需人才，希望各間大專院校可以積極配合。

第二係要多管齊下提高港人嘅生育率。除咗提供金錢、物質上嘅誘因，家庭友善嘅工作環境、方便可靠嘅托兒服務，對於鼓勵青年人結婚生育亦非常關鍵。多位議員嘅修正案都有談及，我唔重複喇。

第三係要更加積極咁，應對因人口老化同勞動力減少帶嚟嘅挑戰。上周嘅議員議案已詳細講咗有關善用樂齡科技，以提升長者生活質素嘅種種意見，當中我強調要喺樓宇設計同城市規劃上要加以配合，提供長者友善嘅居住同生活環境。至於放寬輸入外勞問題，社會亦已討論咗好長時間，依家我哋要坐言起行，唔好再議而不決，決而不行。

第四點係相對較少人提及，就係如何吸引移咗民嘅香港人回流。對於一啲仍然支持黑暴、鼓吹港獨嘅人，相信好多人都唔想佢哋返嚟香港。但喺過去好幾年，亦有唔少本身係愛國愛港嘅香港永久居民，基於種種原因移居外地。

當佢哋親身經歷過外哋嘅實際情況，生活所面對嘅種種問題，包括高通脹、高稅率，仲有唔係想像中咁公平同自由嘅環境，部分人以及佢哋嘅下一代，都可能有意回流香港，為特區作出貢獻。要吸引更多呢類人返港工作同定居，住屋、稅務、子女教育等都係重要考慮，政府應提出適切措施，加以協助。本人謹此陳詞，支持原議案同各項修正案。