[:zh]「加強對照顧者的支援」議案[:]

[:zh]主席，港人嘅平均壽命係世界前列，出生率係全球最低之一，導致人口老化問題日益嚴重，愈嚟愈多患病同行動不便嘅長者需要其他人照顧。香港嘅安老住宿設施同服務長期供不應求，加上好多長者若非必不得已，都唔想住老人院，希望可以居家安老，繼續同自己熟悉及信任嘅屋企人一齊生活，由佢哋嚟照顧。

然而，呢啲照顧者往往需要返工搵食，分身不暇，甚或係佢哋本身亦年紀唔細，同樣面對健康或其他問題。社會上有唔少六、七十歲嘅子女，照顧八、九十歲嘅父母，以至係七、八十歲嘅父母，照顧五、六十歲嘅殘疾或智障子女嘅個案。正如多位議員指出，近年發生咗多宗因照顧者不堪健康、財政或精神壓力，連同由佢哋照顧嘅長者或殘障家人，一齊自尋短見嘅悲劇。政府係有需要加強對呢啲照顧者嘅支援。

作為建測規園界嘅代表，我想集中講吓喺城市規劃同建築設計方面，如何鼓勵居家安老，促進長幼共融，方便需要他人照顧嘅長者同佢哋嘅照顧者。我早喺2015年，已聯同多位來自建測規園界、資訊科技界、以及熟悉安老工作嘅專家，成立「長者適切居所及相關配套研究工作小組」，就促進私人房屋發展提供長者適切居所，提出咗多項具體建議。

小組嘅建議涵蓋更新《香港規劃標準與準則》、檢討《城市規劃條例》與賣地條款、修訂《建築物條例》及相關嘅指引守則，以及透過提供額外樓面作誘因，鼓勵發展商興建更多適合居家安老同長幼共融嘅住宅單位，增加相關嘅長者配套設施。有咗呢啲建築設計同設施，包括闊啲嘅門口、大啲嘅廁所、寬敞一啲嘅走廊，對於長者照顧自己，或者係照顧佢哋嘅人士，都會帶來好多方便同益處。

不過，由於上述建議涉及多個部門、多個政策局，如同其他跨政策範疇嘅建議一樣，好難期間有政府部分會主動跟進，令人嘆息。我希望隨着香港社會恢復穩定，政治環境回復理性，特區施政重新聚焦社會民生之下，政府會重新研究、積極跟進我同小組提出嘅各項建議。

最後，我想講吓香港嘅人口政策。內地剛剛提出改行「三孩政策」，以應對不斷加劇嘅「少子化」同人口老化問題。喺一啲出生率更低，出現人口負增長嘅國家，例如日本、南韓同多個歐陸國家，佢哋更會透過送錢、送車、送樓等方法，去鼓勵國民生育。香港向來冇限制市民生育，但同時亦冇乜政策措施，去積極鼓勵、便利市民生兒育女。

香港喺最近二、三十年，都係依賴外來移民，尤其係內地嘅單證程人士，嚟補充香港嘅人口同勞動力，減慢人口老化速度。但隨着內地嘅年輕人口比例下降，呢一招好快就會失效。呢個情況不單會影響香港嘅長遠經濟發展，對香港嘅安老服務、居家安老嘅目標，亦造成極大挑戰。我希望政府會積極檢視有關情況，參考其他地區做法，及早為香港制訂全面嘅人口政策同鼓勵生育嘅措施。

本人僅此陳詞，支持議案。[:]