「加快落實粵港澳大灣區跨境安老規劃」議案辯論

主席，我一向關注香港嘅人口老化問題，希望所有長者都活得健康、安心、又開心。政府嘅安老政策係「以居家安老為本，院舍照顧為後援」，隨住兩地加快融合，有唔少香港長者都考慮返內地安享晚年，以享受更寬敞同舒適嘅居住環境，以及相比香港廉宜嘅物價同照顧服務，因此可以喺相關政策口號後面加多一句，變成「以居家安老為本，院舍照顧為後援，跨境安老為選擇」。

必須注意嘅係，跨境安老只係一個選項，唔好畀香港市民、以至內地嘅居民覺得，特區政府係想逼晒所有基層長者返內地，享用由內地政府同納稅人補貼嘅安老服務。更加唔應該因為有愈嚟愈多長者選擇移居內地，就減少、或減慢咗本港嘅安老服務同設施嘅建設。

喺居家安老方面，我再次讚揚今年施政報告，採納咗我多年來嘅建議，着手推動有利長者生活嘅樓宇設計。包括由財政司副司長統籌相關政策局，將鼓勵長幼共融嘅通用設計，同便利長者及殘障人士生活嘅通達概念，納入屋宇署嘅樓宇設計手冊。我希望有關措施可盡早推行。

喺院舍照顧方面，我擔任法案委員會主席嘅《2022年院舍法例(雜項修訂)條例草案》，已於今年6月三讀通過，但要有效落實草案內，各項有關提升院舍人均面積、人手比例、同服務質素嘅建議，工作仲係相當艱鉅嘅。政府同時要促進更多公私營安老院舍嘅興建，致力縮短輪候時間。避免每年大量長者等到離世都輪候唔到資助院舍，或者因為等唔切資助院舍，又冇錢入住私人院舍，就被迫入住內地嘅安老院，令佢哋同喺香港嘅家人分隔兩地。

長者係咪選擇返內地養老，除咗考慮價錢、居住環境同與家人嘅距離，能否享受到同香港水平相若嘅福利及醫療服務，亦至為重要。鄧家彪議員修正案提出嘅「福利可攜」、「服務過河」同「醫療互通」，原則上係值得支持，但亦唔可以忽略對公共財政嘅長遠影響；容許「院舍照顧券」、「社區照顧券」同「長者醫療券」跨境可用，亦要解決如何有效監管質素，同避免欺詐、濫用等問題。

對於林素蔚議員提出，擴展長者醫療券適用範圍至內地嘅三甲醫院，會唔會大幅增加咗對方嘅服務壓力，令到當地嘅患者同長者要輪候更長時間，令到內地政府要提供更多補貼呢？呢啲問題都唔可以忽略。

對於我哋兩位G19成員，陳沛良議員同李浩然議員提出，要善用市場力量，鼓勵有經濟能力嘅中產長者移居大灣區內嘅養老社區，以及協調香港長者喺內地嘅醫保安排，加強樂齡科技，建立長者社區支持體系等，有關建議有助改善長者生活，但唔會大幅增加政府經常性嘅社福開支，我係好支持嘅。本人謹此陳詞。