「團結行政與立法機關，全力推進大灣區建設」議案

主席，感謝邱達根議員，提出「團結行政與立法機關，全力推進大灣區建設」嘅議案，等我有機會就呢次大灣區內地城市考察，總結經驗同提出建議。就今次行程，我主要有4方面嘅觀察同感受。

首先，今次考察體現咗喺新時代之下，香港行政立法團結齊心，攜手推動香港融入大灣區建設嘅決心。

粵港澳大灣區嘅發展概念，早喺2015年就提出，2017年納入國務院嘅政府工作報告，2019年初正式公布《粵港澳大灣區發展規劃綱要》。好可惜，由於嗰幾年正值香港政治爭拗同社會撕裂最為嚴重、行政立法關係相對差嘅時期，任何有關兩地合作嘅倡議，都會被攬炒派污名化、妖魔化，將互惠互利嘅發展同規劃建議，歪曲抹黑成香港「大陸化」、「被規劃」等。部分官員亦因此對參與大灣區建設相對消極同避忌，令香港錯失咗好多時間同機遇。

立法會個別嘅委員會，當年都試過搞內地考察團，但外界焦點往往落咗喺有冇人會示威、嗌口號，以至杯葛，而唔係議員有咩考察成果。今次考察唔止議員好團結，官員都好齊心，令社會可以聚焦番喺考察行程，加強認識有關內地城市嘅最新發展，以及有乜嘢可供香港借鑒同發揮。

我嘅第二個體驗，係國家嘅創新科技同城市發展真係一日千里。今次行程有幾個地方同企業，我以前都去過，但相隔幾年再去，又令到我刮目相看。香港嘅創科發展都係不斷咁向前，但速度唔及內地，尤其喺將科研成果商品化、產業化方面。香港可以點樣善用我國嘅科技、產能、仲有專業及技術人才，從而促進經濟發展同改善市民生活，我認為需要從如何優化認證、招標、以及輸入專才等制度方面着手，提高吸引力同成效。我喺早兩個禮拜嘅議員議案已講過，今日唔再重複。

第三個體驗係內地嘅歷史建築保育工作。我經常批評香港嘅保育政策係「保而不育」，對於一啲具歷史價值同建築特色嘅建築物，特區政府可以保到佢哋唔會冧、唔會拆，但對於如何加以善用，令更多人可以認識到、享用到，發揮應有嘅現代價值，內地有唔少值得借鑒嘅地方同做法。

考察團今次去到嘅深圳「南頭古城」，仲有佛山嘅「嶺南天地」同「南風古灶」，就成功將歷史保育同文化、旅遊發展有機結合，用歷史嚟帶動旅遊，用旅遊嚟帶動商業，再利用有關商業收益，嚟支持番相關保育工作，使到更多本地居民同外地旅客都享用得到，認識到相關嘅文化同歷史，呢啲都值得香港好好學習。

最後一個感受，係有關內地城市如何積極運用土地開發及批給政策，嚟推動不同產業嘅發展，優化城市管理同增加社區設施。呢個題目好大、好闊，今日時間有限，嚟緊喺其他機會再講。本人謹此陳詞，支持議案。