「學習二十大精神 推動香港發展」議案發言

主席，中國共產黨第二十次全國代表大會，簡稱「二十大」，喺上月圓滿舉行，選出新一屆黨領導層，確立咗黨同國家喺新時代下嘅發展路向。「二十大」報告全文超過3萬2千字，內容豐碩全面，難以喺短短5分鐘內詳述，所以我只集中講幾個重點，尤其與香港相關嘅內容同啟示。

首先係強調「新時代中國特色社會主義現代化」。一方面要堅持社會主義道路，另一方面亦要因應中國嘅歷史文化特色，以及國家同國際嘅最新政經發展，不斷改革同優化。

呢個原則放喺香港都係適切嘅。「二十大」強調要長期堅持「一國兩制」方針，保持香港嘅資本主義制度同生活方式長期不變，但咁唔代表特區政府嘅所有政策同制度都係行之有效，一成不變。過去廿五年嘅實踐經驗證明，香港有啲嘢需要堅持、堅守，但亦唔少政策同制度需要優化、改革，否則就適應唔到新時代嘅變遷，更談不上要走向「由治及興」。

「二十大」報告提出香港要「破解經濟社會發展中的深層次矛盾和問題」，當中所指嘅矛盾同問題，習近平主席喺「七一講話」亦已講咗，包括房屋問題、貧富差距、青年問題等等。

此外，「二十大」報告其中一個出現得最多嘅字眼，就係「人民」，強調「江山就是人民，人民就是江山」，中國式現代化係「全體人民共同富裕的現代化」，執政者必須時刻「利民為本」，「不斷實現人民對美好生活的嚮往」。

香港特首李家超任係首份施政報告，亦係「二十大」召開期間發表，但已體現出「二十大」嘅精神。包括強調要完善治理體系，同優化公務員制度，落實「以結果為目標」嘅施政文化，使到市民擁有「幸福感」同「獲得感」，仲有係提速、提量建屋，重奪土地供應主導權，推出青年發展藍圖等，都係呼應咗國家嘅要求，回應咗市民嘅訴求。

除咗支持香港破解經濟及社會矛盾，「二十大」報告亦提到另外3個「支持」，包括支持發揮香港嘅優勢同特點，深化與各國更開放、更密切嘅交往合作；支持香港更好融入國家發展大局，為實現中華民族偉大復興更好發揮作用；以及喺國內外形成更廣泛嘅支持「一國兩制」統一戰線。

當中發揮香港優勢同融入國家發展，其實係一脈相承嘅。我曾多次批評，特區政府過去不論喺經濟發展、城市規劃、基礎建設，以至係人口、人才政策方面，往往都係畫地為牢，以深圳河為界，唔會去全面認識、配合、同參與我哋國家嘅規劃同發展。 最近一兩年，我哋睇到特區政府係有改變嘅，包括提出「北部都會區發展策略」，喺多方面加深港人對國家發展嘅了解同參與。但單靠特區政府努力並唔足夠，我哋全體議員、各個團體、專業、同界別，都有其責任及角色，都要一起努力，為國家邁進新時代，為特區開啟新篇章，作出貢獻。主席，本人謹此陳詞，支持議案。