[:zh]「把握契機 改善施政」議案[:]

[:zh]主席，我發言係支持張國鈞議員提出嘅「把握契機、改善施政」議案。首先講吓「契機」，第一個契機係全國人大常委會去年通過《港區國安法》，為之前被黑暴肆虐嘅香港社會止暴制亂、由亂至治。

第二個契機係人大常委會有關香港立法會議員資格嘅決定，加上立法會兩度修改《議事規則》，令議會運作回復正常，停止拉布攬炒。如果唔係有關決定同修訂，我相信今次議案根本連辯論嘅機會都冇。

第三個契機係全國人大喺今年3月11日通過，有關完善香港選舉制度嘅決定，為香港選舉制度堵塞漏洞，為特區政制發展撥亂反正。

不過，有咗穩定嘅社會、高效嘅議會，同完善嘅選舉制度，唔代表香港經濟民生就立即得以改善，特區政府民望可自動提升。政府必須做好把握今次得來不易嘅契機，切實改善施政。

國家主席習近平2017年向特區管治班子發表講話，點出咗香港管治問題嘅三大癥結。第一係「一寸丹心為報國」，香港小部分管治者嘅愛國觀念薄弱，對國家認識不足，更甚係對分裂國家同勾結外國行為縱容放生。政府要求全體公務員宣誓效忠，並將拒絕效忠者踢走，絕對係必要做法。

第二係「為官避事平生恥」，經歷黑暴及疫情打擊，部分部門與官員遇難避事、敷衍塞責，直至最近先有所改善。對於社會上好多老、大、難嘅問題，包括土地房屋短缺、樓宇老化失修等，政府依家已不再回避，設法解決，但係處理必須加快。

第三係「上下同欲者勝」，市民對公務員嘅印象除咗「慢」，就係「推」，包括推卸責任、推畀其他部門，各家自掃門前雪，缺乏「上下同欲」嘅精神。

仲有一點係原議案提到嘅因循文化。香港公務員對於任何新事物、新科技，以至新嘅建築器材同用料，必須放棄過去唔想用、唔想學，或者話冇先例可循，堅稱舊有制度同做法行之有效嘅思維。

特首喺去年施政報告提出推行公營部門改革，包括著力精簡有關土地房屋發展嘅管制及審批程序，作為有關改革嘅倡議者之一，我睇到相關官員係有心做事嘅，但始終都係唔夠果斷、唔夠快，希望當局繼續努力。

最後我再引述兩段中央官員嘅講話，希望全體主要官員同公務員時刻謹記：第一段係習主席去年嘅深圳講話，強調為官者必須堅定理想信念、更新智識觀念、掌握過硬本領，自覺站喺國家大局上想問題、辦事情，並要建立健全激勵機制，推動形成「能者上、優者獎、庸者下、劣者汰」嘅正確導向。

第二段係國務院副總理韓正今年兩會期間嘅發言，強調香港嘅住房問題不論如何困難，都總要有開始解決嘅時候，否則全港老百姓嘅利益都會受到損害。本人僅此陳詞。[:]