「推動培養本地專業服務業人才」議案

主席，首先感謝黃俊碩議員提出今日嘅「推動培養本地專業服務業人才」議案。黃議員係今屆新當選嘅議員，我就已經做到第三屆嘞，但我哋有幾個共通點嘅：第一，我哋都係來自功能界別；第二，我哋都係代表專業服務業；第三，我同佢喺過去一年，都經常喺唔同場合，訴說我哋嘅業界面對嘅人手不足同人才流失問題。

我哋仲有一個共通點嘅，有啲行業同界別，面對人手短缺，首先就嗌輸入外勞。我同黃議員都唔會反對有限度輸入非本地專才，但係我哋同時認為，加強培訓本地人才先係長遠之計，治本之道。

早喺黑暴同疫情爆發前，我同部分業界人士已預示到，我哋建測規園界同工程界等與發展及建設相關嘅專業界別，未來幾年將會出現人手不足危機，向政府建議本地大學增加相關嘅專業培訓學額。結果係發展局推教育局、教育局推教資會、教資會就推說呢啲係「大學自主」，但明明各間大學用緊嘅大部分都係納稅人嘅錢，點解政府會完全冇話語權嘅呢？

其後黑暴與疫情爆發之後，好多工程及顧問項目受阻，建造業失業率飆升，好多人都唔敢再提「人手不足」呢幾隻字，但我都係一直堅持嘅，認為唔應該因一時嘅經濟不景，而放慢咗培育專業同技術人才嘅步伐。結果疫情一過，社會復常，再加上移民潮，多個專業界別都出現嚴峻嘅人手荒。

今屆政府強調要對外「搶人才」，我係支持嘅，但係要強調唔應該忽略咗本地專業及技術人才嘅培訓。必須確保各大學開辦嘅課程，唔係只求國際排名，而係要配合到政府嘅政策同香港嘅長遠發展需要。

主席，講番我嘅修正案，實質內容只有兩個字，就係「留住」；強調香港不單要搶人才同培訓人才，仲要想方設法留住現有嘅人才。對於一啲至今仍支持黑暴、鼓吹港獨嘅頑劣分子，我都講過好多次，佢哋留喺香港對大家都未必係好事。但對於一啲純粹因為工作壓力太大、居住空間小，以至係不滿香港教育制度而有意離開嘅人，政府要諗啲辦法留住佢哋。

亦有部分年青專業人士，包括我哋建測規園界，佢哋未必係離開香港，而係原有嘅專業同行業。原因包括不滿工時過長、工作量同責任與收入回報不成正比、缺乏發揮創意同實踐理想嘅空間等，導致佢哋寧願搵份收入少啲，但自由度同發揮空間多啲嘅工作。

有咩解決方法呢？亦係我呢幾年不斷提出嘅，首先要改革政府嘅採購招標制度，降低「價低者得」嘅比重，更要着重創意同創新，使到專業人士同中小企都能夠取得合理回報，拉近政府與私人企業內年青專業嘅待遇差距。仲有係精簡與發展相關嘅法規同行政審批程序，讓專業人士真係做番啲專業嘅嘢，而唔係花晒啲時間去填表格、跑部門、走過多同不必要嘅程序。

本人謹此陳詞，支持原議案，並呼籲大家支持我同李惟宏議員提出嘅修正案。