「推動港人港商融入國家發展大局」議案

主席，首先感謝G19嘅周文港議員，提出今日嘅「推動港人港商融入國家發展大局」議案。無論係去年嘅中共二十大報告，定係剛結束嘅全國兩會嘅領導人講話，都喺強調中央支持香港同澳門，更好咁融入國家發展大局。對於原議案要求完善相關政策局同公營機構嘅職能及服務、優化支援港人港商及相關團體嘅政策措施、制訂有關績效指標同發展「內交關係」嘅藍圖等等，我認為都係重要嘅。

香港嘅專業服務業，包括我代表嘅建築、測量、都市規劃及園境業界，喺改革開放初期已致力融入國家發展，積極參與國家建設，希望為內地嘅企業、個人，以至官方機構，提供香港擁有獨特優勢、並能與國際接軌嘅專業服務。但特區政府過去嘅支援喺協助專業服務業融入國家發展方面，唔算積極，好多時候都要我哋個別嘅企業、學會，甚至個人單打獨鬥。

差不多20年前，喺我擔任香港測量師學會會長時候，聯同業界成功爭取到兩地嘅首項專業資格互認。但之後嘅發展進度，政府嘅協助程度，可以話係差強人意，未能充分發揮專業界喺獲得資格互認後，對促進國家發展產生嘅更大效用。大家常常聽到「大門開，小門唔開」嘅問題，係我哋取得內地嘅專業資格，唔代表香港嘅專業人士同相關顧問服務公司，就可以直接競投各類工程及顧問服務項目同喺內地提供服務，當中仲涉及資質互認嘅問題。

喺我同好多業界人士努力爭取下，內地當局前年開始試行以登記備案方式，容許已獲特區政府認可嘅發展、建設專業顧問公司，直接喺喺廣東省內嘅大灣區城市執業同開業。但對於一啲成立年期較短，或者冇做開政府工程或顧問項目嘅公司，佢哋就未能受惠於有關政策。因此我一直要求政府放寬有關規定，容許更多中小型、以及主要為私營企業提供服務嘅公司，可以加入政府認可嘅名單，等佢哋可以通過備案制度喺內地開業同執業。

另外一個協助中小型公司同年輕專業人士嘅方法，就係搵一啲合適嘅內地項目，以設計比賽嘅方式畀佢哋參與。喺2019年疫情前，我同前海管理局同我代表嘅4個香港專業學會，合辦「前海‧香港青年建築設計比賽」，讓香港嘅建測規園青年專才，有機會參與前海嘅公共建設。比賽係相當成功嘅，可惜過去3年因疫情關係而未能舉辦。

隨着兩地疫情減退，我哋今年立即復辦有關比賽，而且喺競賽項目、參賽對象、同獎項獎金等方面，都比之前有所提升。比賽現正接受報名，我喺度呼籲更多合資格嘅青年人積極參賽。我亦希望特區政府未來會有更大嘅參與，包括向內地當局爭取更多嘅項目，協助業界舉辦更多類似嘅比賽。本人謹此陳詞。